سالماعى 4 كگ ءسابي قۇيىمشاق تۇبىندە ۇلكەن ىسىكپەن دۇنيەگە كەلدى. بۇل پاتولوگيا قاتەرسىز بولعانىمەن، ءومىردىڭ العاشقى ايلارىندا قاتەرلى ىسىككە اينالۋ ءقاۋپى بار.
ءسابي تۋعاننان كەيىن بىردەن پەرزەنتحانادان بالالار شۇعىل مەديسينالىق كومەك كورسەتۋ ورتالىعىنا، جاڭا تۋعان نارەستەلەردىڭ جانساقتاۋ بولىمىنە اۋىستىرىلدى. وتاعا تولىق دايىندىق جاسالىپ، ءومىرىنىڭ ەكىنشى كۇنىندە نەوناتالدى حيرۋرگتار ىسىكتى الىپ تاستادى.
«بالا اۋرۋحاناعا ۇلكەن قاتەرسىز ىسىك — سەگىزكوز-قۇيىمشاق ايماعىنىڭ تەراتوماسىمەن ءتۇستى. ىسىك سۇيەك، جۇمساق ءتىن جانە كيستوزدى قۋىستان قۇرالعان. وتا ءساتتى ءوتتى، جانە ادەتتە پلاستيكالىق حيرۋرگيادا قيىندىقتار تۋىندايتىن بولسا دا، بۇل جولى ءبارى ويداعىداي بولدى. ءبىز پلاستيكالىق وتانى سابيگە بولاشاقتا ەشقانداي ىڭعايسىزدىق تۋدىرمايتىنداي ەتىپ جاسادىق. بالا امان-ەسەن ۇيىنە شىعارىلدى»، — دەيدى بالالار شۇعىل مەديسينالىق كومەك كورسەتۋ ورتالىعىنىڭ حيرۋرگى جالعاس قۇنيازوۆ.
وتا 75 مينۋتقا سوزىلدى. حيرۋرگ جانە رەانيماتولوگ مامانداردىڭ تىنىمسىز ەڭبەگىنىڭ ارقاسىندا بالا سالماعى 1 كگ بولاتىن ۇلكەن سۇيەك-كيستوزدى ىسىكتەن قۇتىلدى.
«سەگىزكوز-قۇيىمشاق تەراتوماسى — نەوناتالدى كەزەڭدە ءجيى كەزدەسەتىن ىسىك. ول قۇرساقتا قالىپتاسىپ، نارەستەمەن بىرگە وسەدى، كەيدە ۇرىقتىڭ دامۋى ءۇشىن ماڭىزدى دارۋمەندەردى الىپ قويادى. ءبىزدىڭ جاعدايدا ىسىك 14*20 سم كولەمگە دەيىن ءوستى. تەراتوما تولىعىمەن الىندى، بالانىڭ جاعدايى قاناعاتتانارلىق، ۇيىنە شىعارىلدى. ءبىزدىڭ ورتالىق ايىنا 100-گە جۋىق جاڭا تۋعان نارەستەگە وتا جاسايدى. تۋا بىتكەن اقاۋلاردىڭ سەبەپتەرىنە ەكولوگيا، كليمات، تۇقىم قۋالاۋشىلىق جانە جۇقپالى اۋرۋلار اسەر ەتەدى. سونىمەن قاتار، ءبىز تۋا بىتكەن اقاۋلاردىڭ باستى سەبەپتەرىنىڭ ءبىرى ايەلدىڭ جۇكتىلىك كەزىندە جۇقتىرعان ۆيرۋستىق ينفەكسياسى ەكەنىن انىقتادىق»، — دەپ ءتۇسىندىردى ءبولىم مەڭگەرۋشىسى ساماتبەك مىرزاحمەت.
الماتىداعى بالالار شۇعىل مەديسينالىق كومەك كورسەتۋ ورتالىعىنىڭ ىرىڭدى-توراكالدى حيرۋرگيا جانە نەوناتالدىق حيرۋرگيا بولىمشەسى 30 توسەك-ورىنعا ەسەپتەلگەن. بۇل ورتالىققا ەلىمىزدىڭ بارلىق ايماعىنان اتا-انالار بالالارىن ەمدەتۋگە اكەلەدى.