«تازا قازاقستان» باعدارلاماسى اياسىندا جەتىسۋ اۋدانىندا 700-دەن استام اعاش وتىرعىزىلدى، دەپ حابارلايدى aqshamnews.kz
الماتىدا رەسپۋبليكالىق «تازا قازاقستان» باعدارلاماسى جانە «الماتى – ءبىزدىڭ ورتاق ءۇيىمىز» كۇزگى ناۋقانى اياسىندا جەتىسۋ اۋدانىندا سەنبىلىك جانە اۋدان زەينەتكەرلەرى اراسىندا سپارتاكيادا ءوتتى. سپورتتىق جارىستار ۋشۋ، ايكۋنە، سكانديناۆيالىق سەرۋەندەۋ، ەرلەر اراسىنداعى جەردەن كوتەرىلۋ، اسىق ويىنى، دوپ لاقتىرۋ جانە دارتس سياقتى سپورت تۇرلەرى بويىنشا ۇيىمداستىرىلدى. ءىس-شاراعا بارلىعى 100-دەن استام ادام قاتىستى.
«ءوز اعاشىڭدى وتىرعىز» اكسياسى اياسىندا جانگەلدين اتىنداعى سكۆەردە جاپىراقتى اعاشتىڭ 150 كوشەتى وتىرعىزىلدى.
سونداي-اق، كوكجيەك ساياباعىندا دا تازالىق جۇمىستارى جۇرگىزىلىپ، وندا 500 ءتۇرلى اعاش، ونىڭ ىشىندە شاعان، قايىڭ، ءساناعاشا جانە قاراعان كوشەتتەرى وتىرعىزىلدى.
اۋدان بەلسەندىلەرىمەن بىرلەسە وتىرىپ، ساياباقتان 350 تەكشە مەتردەن استام قوقىس شىعارىلىپ، 40 بىرلىك ارنايى تەحنيكا جۇمىلدىرىلدى.
جەتىسۋ اۋدانى تۇرعىندارىنان بولەك، ەكولوگيالىق ناۋقانعا حالىقارالىق ۇيىم – كورەيانىڭ بەيبىت جانە دەموكراتيالىق بىرىگۋى جونىندەگى كونسۋلتاتيۆتىك كەڭەس، الماتى كورەي ۇلتتىق ورتالىعى جانە الماتى كورەي جاستارى قوزعالىسى قوسىلدى. سەنبىلىك بارىسىندا وسى ۇيىمداردىڭ بەلسەندىلەرى كوكجيەك ساياباعىنا 50 اعاش وتىرعىزدى.
«ەكولوگيالىق اكسياعا قاتىسۋشىلاردىڭ بارلىعىنا زور العىس بىلدىرەمىن. ءقازىر وسىنداي شارالاردى وتكىزۋ وتە ماڭىزدى، ولاردىڭ ارقاسىندا ءبىز بىرلەسىپ كۇش سالىپ، قوعامعا پايدامىزدى تيگىزە الامىز!»، – دەدى كونسۋلتاتيۆتىك كەڭەستىڭ قازاقستانداعى فيليالىنىڭ ءتوراعاسى كان ۋحان.
ناۋقاندى قولداعان قاتىسۋشىلار قالامىزدىڭ تازالىعىن جانە سۇلۋلىعىن ساقتاۋعا اركىمنىڭ قاتىسۋىنىڭ ماڭىزدىلىعىن اتاپ ءوتتى.
«سەنبىلىك – بۇل اۋدانىمىزدىڭ تازالىعى مەن كوركەيۋىنە ۇلەس قوسۋدىڭ تاماشا مۇمكىندىگى. وسى كۇندەرى تۇرعىندار اۋلاسىن رەتكە كەلتىرىپ، ولاردى جايلى ءارى ادەمى ەتۋگە تىرىسادى»، – دەدى بەلسەندى ۇزاق ءومىر ءسۇرۋ ورتالىعىنىڭ باسشىسى، ارداگەرلەر كەڭەسىنىڭ ءتورايىمى تامارا شاكيروۆا.
ەسكە سالا كەتەيىك، الماتىدا 18-24 قازان ارالىعىندا اعاشتاردى سانيتارلىق ماقساتتا كەسۋ، اۋلادا، قوعامدىق ورىندا جانە جول بويىندا تۇسكەن جاپىراقتار مەن قوقىستاردى جيناۋ جۇمىستارى قارقىن العان.