مەديسينالىق ساقتاندىرۋ قورى جىل سايىن پروفيلاكتيكالىق تەكسەرۋلەرگە قاراجات ءبولىپ وتىرادى
ونىڭ ىشىندە، الەۋمەتتىك ماڭىزى بار اۋرۋلاردى انىقتاۋعا ارنالعان سكرينينگتەر دە بار، دەپ حابارلايدى Almaty-akshamy.kz. مىسالى، 2023 جىلى الماتى قالاسى بويىنشا پروفيلاكتيكالىق تەكسەرۋلەرگە 8 ملرد تەڭگە قاراستىرىلعان. جىل باسىنان بەرى حالىقتى سكرينينگتىك تەكسەرۋلەردەن وتكىزگەن ەمحانالارعا 2،2 ملرد تەڭگەدەن استام قاراجات ءبولىندى. سكرينينگتىك زەرتتەۋلەردىڭ ماڭىزى قانداي جانە تەكسەرۋدەن ءوتۋ ءۇشىن قايدا بارۋ قاجەت دەگەن سۇراقتارعا №16 قالالىق ەمحانا دارىگەرى ساۋلە يسماعۇلوۆا جاۋاپ بەردى.
ماماننىڭ ايتۋىنشا، اۋرۋدىڭ كوبى قانشالىقتى ەرتە انىقتالسا سونشا تەزىرەك جازىلادى. ۋاقتىلى انىقتالعان دەرتتى ەمدەۋ دە وڭاي.
سكرينينگ دەگەنىمىز نە جانە ونىڭ قاجەتى قانشا؟
سكرينينگ – اۋرۋدى جانە ونىڭ تۋىنداۋىنا اسەر ەتەتىن فاكتورلاردى ەرتە انىقتاۋعا مۇمكىندىك بەرەتىن مەديسينالىق زەرتتەۋلەر جيىنتىعى. تەكسەرۋدىڭ بۇل تۇرىنە سالالىق مامانداردىڭ كونسۋلتاسياسى مەن زەرتحانالىق-دياگنوستيكالىق زەرتتەۋلەر كىرەدى.
سكرينينگ ارقىلى قانداي سىرقاتتاردى انىقتاۋعا بولادى؟
• زياندى ادەتتەردەن تۋىندايتىن ءقاۋىپ فاكتورلارىن ەرتە انىقتاۋ – 30-70 جاس ارالىعىنداعى ەرلەر مەن ايەلدەر
• ارتەريالدى گيپەرتونيا، جۇرەكتىڭ يشەميالىق اۋرۋى مەن قانت ديابەتىن ەرتە انىقتاۋ – اتالعان دياگنوز نەگىزىندە ديناميكالىق باقىلاۋعا الىنباعان 40-70 جاس ارالىعىنداعى ەرلەر مەن ايەلدەر
• گلاۋكوماعا تەكسەرۋ (كوز ءىشى قىسىمىن) – 40-70 جاس ارالىعىنداعى ەرلەر مەن ايەلدەر
• جاتىر موينى وبىرىن ەرتە انىقتاۋ – 30-70 جاس ارالىعىنداعى ايەلدەر
• ءسۇت بەزى وبىرىن ەرتە انىقتاۋ – 40-70 جاس ارالىعىنداعى ايەلدەر
• كولورەكتالدى وبىردى ەرتە انىقتاۋ – 50-70 جاس ارالىعىنداعى ەرلەر مەن ايەلدەر
• ۆ مەن س ۆيرۋستى گەپاتيتتەرىن ەرتە انىقتاۋ.
سونىمەن قاتار، پروفيلاكتيكالىق تەكسەرۋلەردەن 18 جاسقا دەيىنگى بالالار دا وتە الادى. وعان بالانىڭ پسيحوفيزيكالىق جانە جىنىستىق دامۋ دەڭگەيىن باعالاۋ، زورلىق-زومبىلىق بەلگىلەرى بار-جوعىن انىقتاۋعا ارنالعان تەكسەرۋلەر كىرەدى. بالا دەنساۋلىعىنان قانداي دا ءبىر كىنارات تابىلعان جاعدايدا سالالىق مامانعا جولداما بەرىلەدى.
پروفيلاكتيكالىق تەكسەردەن وتۋگە جولدامانى كىم بەرەدى؟
سكرينينگتەن ءوتۋ ءۇشىن تىركەلگەن ەمحاناداعى ۋچاسكەلىك دارىگەردەن (تەراپيەۆت) جولداما الۋ قاجەت. جاس مولشەرىنە قاراي بەكىتىلگەن سكرينينگتەردەن بىردەن وتۋگە بولادى.
پروفيلاكتيكالىق تەكسەرلەر ءمامس پاكەتىنە ەنگەن، سوندىقتان سكرينينگتەن وتەتىن ازامات ساقتاندىرىلعان بولۋى شارت.
سكرينينگتەن جىلىنا نەشە رەت وتۋگە بولادى؟
سكرينينگتىك زەرتتەۋلەردىڭ كەي ءتۇرى بەس جىل سايىن، كەيبىرى – ەكى نەمەسە ءتورت جىلدا ءبىر رەت جاسالادى. بۇل مەرزىم ءار اۋرۋدىڭ دامۋ قارقىنىنا قاراي بەلگىلەنگەن.
سكرينينگ ناتيجەسىن قالاي بىلۋگە بولادى؟
سكرينينگتىك زەرتتەۋدەن وتكەن پاسيەنتتەر دەنساۋلىعىنان اقاۋ تابىلعان جاعدايدا سالالىق مامانداردىڭ كونسۋلتاسياسىنا جىبەرىلەدى، قاجەت بولعاندا ەم تاعايىندالادى.