بۇگىن ەلوردادا «وزگەرمەلى الەمدەگى ازيا: بولاشاقتىڭ كۇن ءتارتىبى» تاقىرىبى بويىنشا ازياداعى قاۋىپسىزدىك جانە ىنتىماقتاستىق فورۋمى باستالدى، دەپ حابارلايدى Almaty-akshamy.kz.
شارا بارىسىندا ءسوز العان سىرتقى ىستەر ءمينيسترى مۇرات نۇرتىلەۋ ازياداعى ساياسي جانە ەكونوميكالىق ماسەلەلەردى تالقىلاپ، ءوز ۇسىنىسىن ءبىلدىرۋ ءۇشىن استاناعا جينالعان ساراپشىلارعا العىس ءبىلدىردى، دەپ جازدى قازاقپارات. سونىمەن قاتار ۆەدومستۆو باسشىسى فورۋمنىڭ قاتىسۋشىلارىنا ارنالعان مەملەكەت باسشىسى قاسىم-جومارت توقايەۆتىڭ حاتىن وقىپ بەردى.
«قۇرمەتتى فورۋم قاتىسۋشىلارى!
مەن سىزدەردى ەلوردادا ءوتىپ جاتقان جوعارى دەڭگەيدەگى شارادا قارسى العانىما قۋانىشتىمىن. قازىرگى كۇردەلى جاھاندىق جاعدايدا ساراپشىلار قاۋىمداستىعىمەن تىكەلەي ءارى اشىق ديالوگ ورناتۋ اسا قاجەت بولىپ وتىر. بۇگىنگى تاڭدا الەم بۇرىن سوندى بولماعان قيىنشىلىقتارعا تاپ بولدى. ءبىز جاھاندىق ەكونوميكا تۇراقسىزدىعىنىڭ، ءوسىپ كەلە جاتقان گەوساياسي شيەلەنىستىڭ كۋاسى بولىپ وتىرمىز. وسى ماسەلەلەر بەلگىسىزدىك پەن وزگە دە يدەولوگيالىق سالدارعا الىپ كەلەدى. دەگەنمەن كەڭ اۋقىمدى داعدارىستار الەمدىك قاۋىمداستىق ءۇشىن، ونىڭ ىشىندە ازيا ءۇشىن مۇمكىندىك ۇسىنادى. سوندىقتان ءبىز بىرلەسكەن كۇش-جىگەرىمىزدى ءقاۋىپسىز، ءادىل الەم قۇرۋداعى سىندارلى يدەيالار مەن تىڭ تاسىلدەردى تابۋعا باعىتتاۋىمىز ماڭىزدى. سوندىقتان ساياساتتانۋشىلار، ەكونوميستەر، جەتەكشى ساراپشىلار، بەلدى ساراپتامالىق ورتالىقتار جانە عىلىمي-زەرتتەۋ يستيتۋتتارى بۇل پروسەستە شەشۋشى رولگە يە»، - دەلىنگەن مۇرات نۇرتىلەۋ وقىپ بەرگەن پرەزيدەنتتىڭ حاتىندا.
فورۋمعا ازيا ەلدەرىنەن كەلگەن 60-تان استام ساراپشى قاتىسىپ جاتىر.
ايتا كەتەيىك، اتالعان شارا ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى جانە سىرتقى ىستەر مينيسترلىگىنىڭ بىرلەسىپ ۇيىمداستىرۋىمەن ءوتىپ جاتىر.