الماتى قالالىق جەدەل شۇعىل كومەك كورسەتۋ اۋرۋحاناسى قان قۇيۋ بەكەتىنە اينالدى. ساعات تاڭعى 8-دەن تۇسكى 2-گە دەيىن اۋرۋحانا قىزمەتكەرلەرىن قالالىق قان ورتالىعىنىڭ وكىلدەرى قابىلدادى، دەپ حابارلايدى اlmaty-akshamy.kz.
بارلىق سانيتارلىق جانە قاۋىپسىزدىك نورمالارىن ساقتاي وتىرىپ، ءماجىلىس زالىندا كىشىگىرىم زەرتحانا ورناتىلدى، مۇندا ءاربىر نيەت بىلدىرگەن دونور: ءوزىنىڭ قان توبىن؛ رەزۋس فاكتوردى؛ گەموگلوبين دەڭگەيىن تەكسەرە الدى.
وسىلايشا قان الۋ الدىندا ءاربىر قىزمەتكەردى ورتالىق دارىگەرى قاراپ، تالداۋلار الىنىپ، ونىمەن اڭگىمە جۇرگىزىلدى.
اتالمىش قايىرىمدىلىق ناۋقانى قجشككا-دا جىل سايىن وتكىزىلەدى، تەك كوروناۆيرۋس كەسىرىنەن بىرنەشە جىل وتكىزىلمەي قالعان.
- اۋرۋحانا دونورلىق قىزمەتكە بەلسەندى قاتىسىپ كەلەدى. بۇل شارا ءبىر جاعىنان ىنتىماقتاستىق پەن ۇيىمشىلدىقتى نىعايتۋ بولسا، ەندى ءبىر جاقتان قوعامنىڭ ءال-اۋقاتىن ارتتىرۋعا قوسقان شاعىن ۇلەسىمىز. قالالىق قان ورتالىعىنىڭ قولداۋىمەن وتكىزىلەتىن «دونور كۇنى» ءبىزدىڭ ءداستۇرىمىز دەۋگە بولادى، - دەيدى قجشككا باس دارىگەرىنىڭ ورىنباسارى گۇلنار جانتۋوۆا.
- قان تاپسىرۋعا تىلەك بىلدىرۋشىلەردىڭ قاتارى جىلدان-جىلعا كوبەيىپ كەلەدى. ولاردىڭ ىشىندە جاستار كوپ، بۇل قۋانتپاي قويمايدى. قاندى كەز كەلگەن دەنى ساۋ، 18 جاستان اسقان، سالماعى كەم دەگەندە 50 كگ بولاتىن ادام تاپسىرا الادى. ارينە، دونورلىققا قارسى كورسەتىلىمدەرى بولماسا. ءبىر ادام تاپسىراتىن 450 مل قاننىڭ فيزيولوگيالىق دوزاسى ءۇش ادامنىڭ ءومىرىن ساقتاپ قالۋى مۇمكىن. الماتى - ۇلكەن قالا. سوندىقتان دونورلىق قانعا قاجەتتىلىك قاشاندا بولادى. جۇيەلى قان تاپسىرۋ جۇرەك-تامىر جۇيەسىن نىعايتىپ، اعزانىڭ ءوزىن-وزى جاڭارتۋ قىزمەتىن قامتاماسىز ەتەدى، - دەيدى نۇرداۋلەت ابدىكادىروۆ، قالالىق قان ورتالىعىنىڭ دونورلار جيناقتاۋ ءبولىمىنىڭ مەڭگەرۋشىسى.
- مەن بۇعان دەيىن دە قان تاپسىرعانمىن. وسىلاي جىل سايىن بۇكىل ۇجىممەن قان دونورلىعىنا قاتىسۋعا قۋانىشتىمىن. سەنىڭ قانىڭ ەرتەڭ بىرەۋدىڭ ءومىرىن قۇتقاراتىنىن ءبىلۋ ماڭىزدى، - دەيدى نەفرولوگ-پەرفۋزيولوگ دارىگەر جانسايا ماقۇلبەك.
- قان تاپسىرۋ - ءقاۋىپسىز جانە يگى ءىس، ەگەر مەنىڭ قانىم بىرەۋگە كومەكتەسسە، مەن قۋانىشتىمىن. ءبىزدىڭ اۋرۋحانا قىزمەتكەرلەرى ءجيى قان تاپسىرادى. ال مەن بۇگىن العاش رەت تاپسىرىپ جاتىرمىن. وسى جاقسى ىسكە ءوز ۇلەسىمدى قوسا الاتىنىما قۋانىشتىمىن. اۋرۋحانامىزدا قان ورتالىعىنىڭ جىلجىمالى بولىمشەسىندە، ەشقايدا شىقپاي قان تاپسىرۋعا جاعداي جاسالعانى قۋانتادى، – دەيدى اۋرۋحانا باس دارىگەرى ورىنباسارىنىڭ م.ا. باۋىرجان وماروۆ.
دونور كۇنىنە اۋرۋحانانىڭ 62 قىزمەتكەرى قان تاپسىرۋعا نيەت ءبىلدىردى، ونىڭ 15ء-ى مەديسينالىق كورسەتكىشتەرگە بايلانىستى (گەموگلوبيننىڭ تومەن بولۋى، قان تامىرىنىڭ جىڭىشكە بولۋى جانە ت.ب.) قان تاپسىرا المادى. وسىلايشا 47 قىزمەتكەر بارلىعى 22 ليتر قان تاپسىردى.
اۋرۋحانا اكىمشىلىگى قالالىق قان ورتالىعىنا وسىنداي مۇمكىندىك ءۇشىن جانە قان تاپسىرىپ ۇلەسىن قوسقان ءاربىر قىزمەتكەرگە وسى شاراعا قاتىسقانى ءۇشىن زور العىسىن بىلدىرەدى. اۋرۋحانا قىزمەتكەرلەرى كۇندەلىكتى جۇمىسىندا عانا ەمەس، مۇقتاج جاندارعا قان تاپسىرۋ سىندى يگى شارالاردا دا بىرلىك پەن ءتارتىپ ۇيلەسىمدىلىگىن كورسەتتى.
