وپەراسيا شامامەن بەس ساعاتقا سوزىلدى
الماتىدا №2 بالالار كلينيكالىق اۋرۋحاناسىندا العاش رەت قول ساۋساعىن رەپلانتاسيالاۋ بويىنشا كۇردەلى وپەراسيا جاسالدى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
الماتىدا العاش رەت ساۋساقتى رەپلانتاسيالاۋ بويىنشا كۇردەلى وپەراسيا ءوتتى.
9 جاستاعى بالانىڭ كوشەدە العان جاراقاتتان ساۋساعى ءبولىنىپ قالعان. دارىگەرلەر تولىقتاي ءبولىنىپ قالعان 5ء-شى ساۋساقتى قايتا جالعاپ، امان الىپ قالدى.
«شۇعىل وپەراسيانى تراۆماتولوگيا ءبولىمىنىڭ مەڭگەرۋشىسى سادىربالين ەرلان، ميكروحيرۋرگتەر كوساريەۆ سەرگەي جانە سموليانكين الەكساندر بىرگە جاسادى. ساۋساقتى قۇتقارۋ مۇمكىندىگى وتە از بولدى. ەكى ءپروفيلدى ماماننىڭ ءبىر ۋاقىتتا قاتىسۋى، ولاردىڭ جەدەل جانە ۇيلەسىمدى جۇمىسىنىڭ ارقاسىندا ۇزىلگەن ساۋساقتى قالپىنا كەلتىرۋ بويىنشا ەڭ كۇردەلى وپەراسيا ءساتتى ءوتتى. مۇنداي وپەراسيانى قازاقستاندا ساناۋلى ماماندار عانا جاساي الادى. ءبىزدىڭ دارىگەرلەردىڭ بىرەگەي تاجىريبەسى مەن بىلىكتىلىگى بار»، - دەپ اتاپ ءوتتى ەمدەۋ مەكەمەسىنىڭ باسپا ءسوز قىزمەتى.
وپەراسيا شامامەن 5 ساعاتقا سوزىلدى.
دارىگەرلەر ساۋساقتى ساقتاپ قالۋ ءۇشىن قولدان كەلگەننىڭ ءبارىن جاساپ، ءتىن مەن تامىرلاردى وپەراسيالىق ميكروسكوپپەن تىگىپ، زاقىمدالعان ساۋساقتىڭ ارتەريالارىن، وتە كىشكەنتاي ديامەترلى جۇيكە تالشىقتارىن بىرىكتىرگەن.
جالعانعان ساۋساقتا سۇيەكتەن باسقا سىڭىرلەر، تامىرلار جانە قان اينالىمى قالپىنا كەلتىرىلدى.
«مۇنداي وپەراسيانى جاساۋ ءۇشىن زاماناۋي ميكروحيرۋرگيالىق تەحنيكا قاجەت: ميكروسكوپ، ميكروحيرۋرگيالىق قۇرالدار جانە وتە جۇقا تىگىس ماتەريالى قاجەت، ونى جاي كوزبەن كورۋ قيىن، مۇنىڭ ءبارى بىزدە 2ء-شى بالالار اۋرۋحاناسىندا بار. بىزگە ديامەترى 1،2 ميلليمەتر بولاتىن تامىرلاردى تىگۋگە تۋرا كەلدى. مۇنداي وپەراسيانى ءتيىستى دايىندىقسىز، جابدىقسىز، قۇرالسىز جانە شىعىن ماتەريالدارىنسىز جۇرگىزۋ مۇمكىن ەمەس»، - دەدى №2 بقكا تراۆماتولوگيا ءبولىمىنىڭ مەڭگەرۋشىسى ەرلان سادىربالين.
كاسىبي رەپلانتاسيا ىقتيمال تاۋەكەلدەردى بولدىرماۋعا، قولدىڭ زاقىمدالعان بولىگىنىڭ قوزعالعىشتىعىن، سەزىمتالدىعىن قالپىنا كەلتىرۋگە مۇمكىندىك بەرگەن.
جالعانعان ساۋساق تولىعىمەن تامىر الىپ، قالىپتى جاعدايدا جۇمىس ىستەپ تۇر.
9 جاسار بالا سەگىز كۇن ستاسيونارلىق ەم قابىلدادى.