الماتىلىق دارىگەرلەر بالانىڭ جۇلىنعان ساۋساعىن ساقتاپ قالدى

مۇنداي بىرەگەي ميكروحيرۋرگيالىق وتا قازاقستاندا العاش رەت جاسالدى.

الماتىنىڭ №2 قالالىق بالالار اۋرۋحاناسىنىڭ دارىگەرلەرى بالانىڭ جۇلىنعان ساۋساعىن ساقتاپ قالدى، دەپ حابارلايدى Almaty-akshamy.kz Astanatv.kz-كە سىلتەمە جاساپ. 

دەنساۋلىق ساقتاۋ مينيسترلىگى باسپا ءسوز قىزمەتىنىڭ حابارلاۋىنشا، 9 جاسار بالا كوشەدە جاراقاتتانىپ قالعان. جەدەل وپەراسيانى تراۆماتولوگيا ءبولىمىنىڭ مەڭگەرۋشىسى ەرلان سادىربالين، ميكروحيرۋرگتەر سەرگەي كوساريەۆ پەن الەكساندر سموليانكين جاسادى.

ساۋساقتى ساقتاپ قالۋ مۇمكىندىگى وتە از بولعان. قازاقستاندا مۇنداي وپەراسيالاردى جاسايتىن مامان تاپشى.

«وتا ۇزدىكسىز 5 ساعاتقا سوزىلدى. بۇل وتە قيىن جۇمىس. دارىگەرلەر قولدان كەلگەننىڭ ءبارىن جاسادى. وپەراسيالىق ميكروسكوپ ارقىلى تىندەر مەن قان تامىرلارىن تىگىپ، زاقىمدانعان ساۋساق ارتەريالارىن، ديامەترى وتە كىشكەنتاي جۇيكە تالشىقتارىن، سۇيەك، ءسىڭىر، تامىرلاردى، كەسىلگەن ساۋساقتاعى قان اينالىمىن جالعادى»، – دەپ حابارلادى دەنساۋلىق ساقتاۋ مينيسترلىگى.

«مۇنداي وپەراسيانى جاساۋ ءۇشىن زاماناۋي ميكروحيرۋرگيالىق قۇرال-جابدىق قاجەت. ءتيىستى دايىندىقسىز، قۇرال-جابدىقسىز مۇنداي وپەراسيالاردى جۇرگىزۋ مۇمكىن ەمەس»، – دەدى №2 قالالىق كلينيكالىق بالالار اۋرۋحاناسىنىڭ تراۆماتولوگيا ءبولىمىنىڭ مەڭگەرۋشىسى ەرلان سادىربالين.

بالا سەگىز كۇن ستاسيونارلىق ەم الدى.