الماتىلىق دارىگەرلەر اۋىر ينسۋلتتەن كەيىن كوماعا تۇسكەن 67 جاستاعى ايەلدى امان الىپ قالدى، - دەپ حابارلايدى aqshamnews.kz ءتىلشىسى.
№4 قالالىق كلينيكالىق اۋرۋحانادا مەديسينا سالاسىنىڭ كاسىبي ورتاسىندا كەڭ تالقىلاۋعا تۇسكەن وقيعا ورىن الدى. مۇندا انيەۆريزمانىڭ جارىلۋىمەن وتكەن ينسۋلتتەن كەيىن كوماعا تۇسكەن 67 جاستاعى ايەلگە ءۇش كۇردەلى وتا جاسالدى. ال ءتورت ايدان سوڭ ول اق حالاتتى ابزال جاندارعا العىس ايتۋ ءۇشىن اۋرۋحاناعا ءوزى كەلدى.
پاسيەنت ستاسيونارعا اسا اۋىر حالدە ءتۇستى: ەسسىز كوما جاعدايى، دەنەنىڭ سول جاق بولىگىنىڭ قيمىلسىزدىعى، ايقىن افازيا جانە مي باعانى قۇرىلىمدارىنىڭ زاقىمدانۋ بەلگىلەرى بايقالدى. ينسۋلت ورتالىعىنىڭ دەرەگىنشە، تەكسەرۋ ناتيجەسى سۋباراحنويدالدىق-پارەنحيماتوزدىق قان قۇيىلۋدى انىقتادى، بۇل - ەڭ ءقاۋىپتى ينسۋلت ءتۇرىنىڭ ءبىرى. ول قارىنشالارعا قاننىڭ وتۋىمەن جانە مي ىسىگىنىڭ كۇرت ۇلعايۋىمەن قاتار جۇرەدى.
دارىگەرلەردىڭ ايتۋىنشا، مۇنداي جاعدايدىڭ باسىم بولىگى ءتىپتى اۋرۋحاناعا جەتپەي ولىممەن اياقتالادى. بۇل جولى ءار مينۋت شەشۋشى بولدى. پاسيەنتتى مۋلتيديسيپلينارلىق توپ -نيەۆرولوگ، رەانيماتولوگ، نەيروحيرۋرگ جانە انەستەزيولوگ ماماندار بىرلەسىپ قابىلدادى. كت-دان باستاپ انگيوگرافياعا دەيىنگى ءاربىر تەكسەرۋ كەزەڭى ءبولىم مەڭگەرۋشىلەرى مەن №4 قكا ينسۋلت ورتالىعى باسشىلىعىنىڭ قاتىسۋىمەن وتكەن كونسيليۋمدا تالقىلانىپ وتىردى.
شەشىم جەدەل قابىلداندى: ەم تاكتيكاسى كىدىرىسسىز قۇرىلىپ، تار بەيىندى ماماندار تولىق جۇمىلدىرىلدى. دارىگەرلەر پاسيەنتتىڭ ءومىرى ءۇشىن كۇرەستە بىرىنەن سوڭ ءبىرى ءۇش وتا جاسادى.
"مي قۇرىلىمدارىنىڭ قىسىلۋ ءقاۋپىنىڭ اسا جوعارى بولعانىن ەسكەرە وتىرىپ، پاسيەنتكە ءۇش شۇعىل وتا جاساۋ قاجەت بولدى. ءبىرىنشىسى - جارىلعان انيەۆريزمانى ەندوۆاسكۋليارلىق ەمبوليزاسيالاۋ. بۇل - قان كەتۋدى توقتاتۋعا جانە قايتا جارىلۋدىڭ الدىن الۋعا مۇمكىندىك بەرەتىن شاعىن ءينۆازيۆتى نەيروحيرۋرگيالىق ءادىس. ەكىنشىسى - سىرتقى قارىنشالىق درەناج ورناتۋ. ونىڭ ماقساتى - باسىشىلىك قىسىمدى تومەندەتۋ جانە مي جۇلىن سۇيىقتىعىنىڭ اينالىمىن تۇراقتاندىرۋ. ءۇشىنشىسى - مي ىشىندەگى گەماتومانى الىپ تاستايتىن دەكومپرەسسيالىق وتا. بۇل اسا ءدال ميكروسكوپيالىق تەحنيكانى قاجەت ەتەتىن كولەمدى نەيروحيرۋرگيالىق ارالاسۋ"، - دەپ تۇسىندىرەدى الماتى №4 قالالىق كلينيكالىق اۋرۋحانا نەيروحيرۋرگى الدونگار ايساۋتوۆ.
كەيىن، ۇزاق ۋاقىت جاساندى تىنىس الدىرۋ قاجەت بولعاندىقتان، پاسيەنتكە تراحەوستوميا جاسالدى - بۇل تىنىس الۋدى ءقاۋىپسىز جۇرگىزۋگە جانە اسقىنۋدىڭ الدىن الۋعا مۇمكىندىك بەردى. پاسيەنت جان ساقتاۋ بولىمىندە بىرنەشە كۇن جاتتى. وسى ۋاقىت بويى ماماندار توبى مونيتورينگ جۇرگىزىپ، قارقىندى تەراپيا قولداندى: باسىشىلىك قىسىمدى باقىلاۋ، نەيروپروتەكتيۆتىك شارالار، تىنىس الۋ مەن گەموديناميكانى تۇراقتاندىرۋ، سۋ-ەلەكتروليت تەپە-تەڭدىگىن تۇزەتۋ. بىرتىندەپ كورسەتكىشتەر جاقسارا باستادى - ءىسىنۋ ازايدى، ناۋقاستىڭ سويلەۋى قالپىنا كەلە باستادى، اياق-قولىنا كۇش قايتا ورالا باستادى.
ومىرىنە تونگەن ءقاۋىپ سەيىلگەننەن كەيىن ناۋقاس بەيىندى نەيروحيرۋرگيا بولىمىنە اۋىستىرىلىپ، وندا وڭالتۋىن جالعاستىردى. ءۇي جاعدايىنداعى وڭالتۋ دا جاقسى ناتيجە بەردى. بۇل كينەزيوتەراپيا، لوگوپەديالىق جۇمىس، نەيروندىق بايلانىستاردى قالپىنا كەلتىرۋدەن تۇراتىن ۇزاق ءارى جۇيەلى ەڭبەك بولدى.
ءتورت اي وتكەن سوڭ دارىگەرلەردىڭ ءوزى بۇنى "دۇرىس تاڭدالعان تاكتيكانىڭ سيرەك كەزدەسەتىن، شابىت سىيلايتىن دالەلى" دەپ اتادى.
№4 قكا نەيروحيرۋرگيا ءبولىمىنىڭ ورديناتورلار بولمەسىنە ۆالەنتينا دوروفەيەۆا كىرىپ كەلدى. ونىڭ سويلەۋى تولىق قالپىنا كەلگەن، ءجۇرىپ-تۇرۋدى قايتا ۇيرەنگەن:
"مەن وسى اۋرۋحاناعا، ءوزىمدى ەمدەگەن دارىگەرلەرىمە، بارلىق مەديسينا قىزمەتكەرىنە شىن جۇرەكتەن ريزامىن. مۇندا تەك حيرۋرگتەر عانا ەمەس، ادامنىڭ ءومىرى سىنعا تۇسكەن ساتتە ءارقايسى ءوز ءرولىن بىلەتىن تۇتاس كوماندا جۇمىس ىستەيدى"، - دەيدى ۆالەنتينا ميحايلوۆنا.
بۇل وقيعا - ميعا قاتىستى اۋىر زاقىمدانۋلار كەزىندە ۋاقتىلى ءارى ءتيىمدى كورسەتىلگەن مامانداندىرىلعان مەديسينالىق كومەكتىڭ ايقىن ۇلگىسى. پاسيەنتتى جۇرگىزۋ ۇدەرىسى №4 قكا مۋلتيديسيپلينارلىق توبى تاراپىنان ق ر دسم قولدانىستاعى كلينيكالىق حاتتامالارىنا سايكەس جۇزەگە اسىرىلدى.
بيىل كەيىنگى 10 ايدا №4 قالالىق كلينيكالىق اۋرۋحانانىڭ ستاسيونارىنا 794 ينسۋلت جاعدايىمەن تۇسكەن پاسيەنت جانە نەيروحيرۋرگ ماماندار جەدەل مي قان اينالىمىنىڭ بۇزىلۋى دياگنوزى قويىلعان پاسيەنتتەرگە شامامەن 300 وتا جاساعان.