الماتى قالالىق جەدەل شۇعىل كومەك كورسەتۋ اۋرۋحاناسىنىڭ (قجشككا) تراۆماتولوگ-ورتوپەدتەرى جامباس سۇيەگى سىنعان 90 جاستاعى كەيۋاناعا جامباس بۋىنىن ەندوپروتەزدەۋ وتاسىن ءساتتى جاسادى.
ناۋقاس ومىرىندە ەكىنشى رەت ءجۇرۋدى ۇيرەندى دەپ ايتا الامىز. ەگەر ەرتە بالالىق شاقتا بۇل تابيعي قۇبىلىس بولسا، بۇل جولى وڭاي بولعان جوق. كاسىبي بىلىكتى دارىگەرلەر مەن جوعارى تەحنولوگيالار ارقاسىندا ءبارى ءساتتى ءوتتى، دەپ حابارلايدى Almaty-akshamy.kz.
تامارا گريگوريەۆنا قجشككا قابىلداۋ بولىمىنە جەدەل جاردەم بريگاداسىمەن شۇعىل تۇردە جەتكىزىلدى. ناۋقاس وڭ جامباس بۋىنى ايماعىنداعى قاتتى اۋىرسىنۋعا جانە وڭ اياقتىڭ تىرەك قابىلەتىنىڭ بۇزىلۋىنا شاعىمداندى. وعان وڭ سان سۇيەگى مويىن بولىگىنىڭ فراگمەنتتەرىنىڭ ىعىسۋىمەن جابىق بازالدى سىنىق دياگنوزى قويىلدى.
ناۋقاستىڭ جاسى مەن جاعدايىن ەسكەرە وتىرىپ، قوسىمشا تەكسەرۋ جانە الدىن الا دايىندىقتان كەيىن مۇمكىندىگىنشە تەز ارەكەت ەتۋ قاجەت بولدى، سوندىقتان ناۋقاس دەرەۋ حيرۋرگيالىق ەمدەۋگە جىبەرىلدى.
وڭ جامباس بۋىنىن بيپوليارلى سەمەنتتىك ەندوپروتەزدەۋ وتاسىن №2 تراۆماتولوگيا جانە ورتوپەديا بولىمشەسىنىڭ مەڭگەرۋشىسى مەدەت جانىسوۆ، تراۆماتولوگتار جانىبەك جۇمابەك، بەگزود حانسەيىتوۆ، انەستەزيولوگ گۇلنار كامالوۆا جاسادى.
وپەراسيا 30 مينۋتقا سوزىلدى.
– مۇنداي جاعدايدا ناۋقاس مۇمكىندىگىنشە از جاتقانى ماڭىزدى. ەگدە جاستا، وكىنىشكە قاراي، كوپتەگەن سوزىلمالى اۋرۋلار جينالىپ قالادى، ونىڭ ۇستىنە جازىلۋى باياۋ ينفەكسيالار قوسىلادى. سوندىقتان مۇنداي ناۋقاستار ءۇشىن ەندوپروتەزدەۋ وتە ماڭىزدى، - دەپ اتاپ ءوتتى بولىمشە مەڭگەرۋشىسى مەدەت جانىسوۆ.
ەگدە جاستاعى پاسيەنتتەر ءۇشىن تولىق پروتەزدەۋ ءقاۋىپتى، ال وستەوسينتەزدىڭ پايداسى جوق. ال جامباستى بيپوليارلى ەندوپروتەزدەۋ نەگىزىنەن السىرەگەن جانە ەگدە جاستاعى ناۋقاستارعا ارنالعان. بيپوليارلى ەندوپروتەزدەۋ پاسيەنتتى تولىققاندى، بەلسەندى ومىرگە مۇمكىندىگىنشە قىسقا مەرزىمدە جانە مەيلىنشە از تاۋەكەلمەن قايتارۋ ءۇشىن قولدانىلادى.
جامباستى بيپوليارلى ەندوپروتەزدەۋ وتاسى تولىق ەندوپروتەزدەۋگە (ەكى ساعاتتان استام) قاراعاندا، بىرنەشە ەسە جىلدامىراق جاسالادى (شامامەن جارتى ساعات) جانە جالپى انەستەزيامەن دە، جەرگىلىكتى انەستەزيامەن دە ورىندالۋى مۇمكىن.
• تولىق ەندوپروتەزدەۋگە قاراعاندا، بيپوليارلى ەندوپروتەزدەۋ از جاراقاتتى ءارى الدەقايدا از ەنەرگيانى قاجەت ەتەدى. تولىق ەندوپروتەزدەۋ كەزىندە ءارقاشان گەموترانسفۋزيا جۇزەگە اسىرىلادى، بۇل ەگدە جاستاعى جانە سوزىلمالى اۋرۋى بار ناۋقاستار ءۇشىن قولايسىز.
• وپەراسيادان كەيىنگى كەزەڭ مەيلىنشە از ۋاقىتتى الادى. ال وستەوسينتەزدەن كەيىنگى قالپىنا كەلتىرۋ جانە وپەراسيادان كەيىنگى گيپوديناميا ايلارعا سوزىلادى.
وپەراسيا جاسالعان سوڭ، 3 كۇننەن كەيىن تامارا گريگوريەۆنا ورنىنان تۇرىپ، پالاتادا جۇرە باستادى. اۋرۋحانادان 9-كۇنى شىعارىلعان كەزدە ول ءبولىم دالىزىمەن ءجۇرىس ارباسىمەن ءوز بەتىنشە قوزعالدى. دارىگەرلەر ءبارى جاقسى بولاتىنىنا سەنىمدى. ەڭ باستىسى، ول ءوز قۇتقارۋشىلارىنىڭ ۇسىنىستارىن بۇلجىتپاي جاۋاپكەرشىلىكپەن ورىندايدى، بۇل وتە ماڭىزدى.
تامارا گريگوريەۆنا اۋرۋحانا دارىگەرلەرى مەن مەدبيكەلەرىنە شەكسىز العىسىن ءبىلدىردى.