شوكولادتان جاسالعان ونەر تۋىندىسى كورەرمەن نازارىنا ۇسىنىلدى.
الماتىنىڭ ورتالىق مۋزەيىنە قويىلعان ەكسپوناتتارعا بەس ءجۇز كەلىدەن استام شوكولاد جۇمسالدى. مۇندا ءتاتتى بۇيىمدار مەن مۇسىندەردى كەزدەستىرۋگە بولادى. تاقىرىپ سان الۋان. اس ءۇي جابدىقتارى، باۋ-باقشا ونىمدەرى، حايۋاناتتار باعى... وسىنىڭ ءبارىن ءبىر جەردەن كورە الاسىز. بۇدان بولەك اۋىز تيۋگە دە بولادى، دەپ حابارلايدى Almaty-akshamy.kz 24.kz-كە سىلتەمە جاساپ.
كادىمگى پينگۆين، پۋدەل يت، سپورت كۋبوگى، فۋتبول دوبى، جەمىس-جيدەك پەن كوكونىس سالىنعان سەبەتتەر. وسىنىڭ ءبارى ءتاتتى ءيىسى اڭقىعان تازا تابيعي شوكولادتان جاسالعان. سىرتى يتاليالىق گلازۋرمەن قاپتالعان. شىنايى شىققاندىعى سونشالىق ونىڭ شوكولاد ەكەندىگىنە سەنۋ قيىن.
«ءبىز كورگەن تۋىندىلاردا سونداي كەرەمەت جاسالعان. سونىمەن قاتار بىزدە شەبەرلىك سىنىبى بولدى جانە دە ونىڭ الدىندا دەگۋستاسيا بولدى. شوكولادتىڭ 8 ءتۇرىنىڭ ءدامىن كوردىك. بىزگە ۇنادى. ماعان ەڭ قاتتى ۇناعانى ول – ليموندى شوكولاد. ءدامى ەرەكشە بولدى. ونىڭ قۇرامىندا ءۇش قوسپا بار ەكەن»، - دەيدى ستۋدەنت توعجان دەمەجانوۆا.
شوكولادتان بۇيىم جاساۋ وڭاي شارۋا ەمەس. وعان شىدامدىلىق، تۇپتەپ كەلگەندە ىجداحاتتىلىق كەرەك. «سوندا عانا كوپشىلىكتى تاڭعالدىراتىن دۇنيە پايدا بولادى»، – دەيدى شەبەرلەر. كورمەگە كەلۋشىلەر سول ناعىز قولىنان بال تامعان اسپازدارمەن كەزدەسىپ، كەڭەستەرىن تىڭدادى. ءتىپتى ولاردى ۇيلەرىنە شاقىرىپ، ءوز اسۇيلەرىندە شوكولاد جاساۋعا مۇمكىندىك بەرىلدى. رەسەي شوكولاد مۋزەيى وكىلدەرىنىڭ ايتۋىنشا، ارنايى قاپتاماسى بولماسا، بۇل زاتتاردىڭ ءپىشىنى تەز بۇزىلادى. سوندىقتان ونى تاسىمالداعاندا اسا اباي بولعان ءجون.
«ءاربىر ەكسپونات ءۇشىن قوراپ جاساتتىق. ونىڭ ءوزى سول ءمۇسىننىڭ نەمەسە بۇيىمنىڭ كوشىرمەسى سياقتى بولۋى ءتيىس. سوندا عانا عانا ەكسپوناتتاردى ساقتاي الامىز. قىستا تاسىمالداۋعا جەڭىل. ەرىپ كەتەدى دەپ قورىقپايمىز. جازدا ارينە، توڭازىتقىشسىز جۇرمەيمىز. ونىڭ وزىندە بەلگىلى ءبىر تەمپەراتۋرادا ۇستايمىز»، - شوكولاد مۋزەيىنىڭ وكىلى الەكساندرا گالكينا.
ەسكە سالا كەتەيىك، بۇل كورمە الەمنىڭ 70-كە تارتا قالاسىندا بولعان. ونى قازاقستان، رەسەي، ازەربايجان، جۇڭگو سياقتى ەلدەردىڭ تۇرعىندارى تاماشالاعان. جالپى مۇنداي شوكولادتىڭ جارامدىلىق مەرزىمى 3 جىل. سوندىقتان ەكسپوناتتاردى ۇنەمى جاڭارتىپ وتىرادى.