ماماندار ءوز كەڭەسىن بەردى.
الماتىدا 6 كوپسالالى قالالىق ەمحانادا تراۆماتولوگيالىق پۋنكتتەر بار. ولاردىڭ ءارقايسىسىندا دارىگەرلەر تەك سىنىق جاراقاتىن العان كەزدە عانا ەمەس، ۇسىك شالۋ، كوشە جانە سپورت جاراقاتى بولسا، جول-كولىك وقيعاسى سالدارىنان بولعان جاراقاتتار كەزىندە كومەك كورسەتۋگە دايىن. الماتى قالالىق قوعامدىق دەنساۋلىق ساقتاۋ باسقارماسىنىڭ شتاتتان تىس تراۆماتولوگى قانات تەزەكبايەۆ وكق-دە وتكەن بريفينگتە ماۋسىمارالىق كەزەڭدە جانە قىس مەزگىلىندە جاراقاتتانۋدان قالاي ساقتانۋ كەرەكتىگى تۋرالى ايتتى، دەپ حابارلايدى Almaty-akshamy.kz .
تراۆموتولوگيالىق پۋنكتتەر No4 قالالىق كلينيكالىق اۋرۋحانا، No7 قالالىق كلينيكالىق اۋرۋحانا، قالالىق جەدەل شۇعىل كومەك كورسەتۋ اۋرۋحاناسى، ورتالىق كلينيكالىق اۋرۋحانا، بالالار شۇعىل مەديسينالىق جاردەم ورتالىعىندا ورنالاسقان. ولار مەديسينالىق كومەكتىڭ كەپىلدىك بەرىلگەن كولەمى اياسىندا تاۋلىك بويى كومەك كورسەتەدى.
قانات تەزەكبايەۆ اتاپ وتكەندەي، كۇن سۋىتقالى بەرى كومەك سۇراپ، شاعىم ايتىپ كەلگەندەر قاتارىنىڭ كوبەيۋى نەمەسە ازايۋى بايقالمايدى. ول جاقىندا بولعان مىسالداردىڭ ءبىرىن كەلتىردى، تۇراقتى تۇرعىلىقتى جەرى جوق ەر ادامنىڭ ەكى اياعىن ءىى دارەجەلى ۇسىك شالىپ، No4 قالالىق كلينيكالىق اۋرۋحاناعا جاتقىزىلدى. دارىگەرلەر وعان بىلىكتى كومەك كورسەتتى، سونىڭ ارقاسىندا اياق-قولدارىن امان ساقتاۋ مۇمكىن بولدى، امپۋتاسيا قاجەت بولمادى.
الماتىلىق تراۆماتولوگتار جىل باسىنان بەرى بارلىعى 17 183 ناۋقاستى ەمدەگەن. كوبىنەسە مەديسينالىق كومەككە جۇگىنگەندەر - كوشەدە العان جاراقاتتارىنا بايلانىستى كومەك سۇراپ كەلگەن تۇرعىندار ەمدەلدى. بۇل رەتتە تۇرمىستىق جانە جول-كولىك وقيعالارىنداعى ءولىم-جىتىمنىڭ تيىسىنشە 0،83% جانە 1،4%-عا تومەندەۋىنىڭ وڭ ديناميكاسى بايقالادى.
دارىگەر قىس مەزگىلىندەگى ويىن-ساۋىق پەن كوڭىل كوتەرۋ كەزىندە بولىپ جاتاتىن قاۋىپسىزدىك تۋرالى ەسكە سالدى، ويتكەنى ولار كوبىنەسە جاراقات الۋمەن اياقتالىپ جاتادى.
«تاۋدا شاڭعى ماۋسىمىنىڭ اشىلۋىمەن جانە كوكتايعاقتاردىڭ باستالۋىمەن ءبىز سپورت جانە كوشە جاراقاتتارىنىڭ كوبەيەتىنىن بىلەمىز. كوبىنەسە ناۋقاستار توبىق بۋىنىنىڭ جاراقاتتارى، سوزىلۋى، جىرتىلۋى، بىلەزىك بۋىنىنىڭ سىنۋى شاعىمدارىمەن ءجيى كەلەدى. قىستا بولاتىن تاعى ءبىر ءقاۋىپ – ۇسىك شالۋ»، - دەيدى دارىگەر.
قىسقى سپورتپەن شۇعىلدانعالى جۇرگەن ازاماتتاردىڭ ءوز مۇمكىندىكتەرىن ولشەپ، جىلدامدىقتى ەسكەرۋى وتە ماڭىزدى.
الماتى قالالىق قوعامدىق دەنساۋلىق ساقتاۋ باسقارماسىنىڭ شتاتتان تىس تراۆماتولوگى قانات تەزەكبايەۆ مەگاپوليس تۇرعىندارىنا قىستا، اسىرەسە كوكتايعاق كەزىندە: ماۋسىمعا ساي ىڭعايلى اياق كيىم كيۋگە، قالا قىزمەتى وڭدەگەن قۇم سەبىلگەن جاياۋ جۇرگىنشىلەر جولىمەن جۇرۋگە كەڭەس بەرەدى.
«اشىق دالادا سەرۋەندەۋدى ۇناتاتىندار ءۇشىن شاڭعى تراسسالارى مەن مۇز ايدىندارىندا نۇسقاۋشىلاردىڭ ەرەجەلەرىن ساقتاۋدى، سونداي-اق تاۋدان ءتۇسۋ كەزىندە ءوز مۇمكىندىكتەرىڭىزدى ولشەۋدى سۇرايمىز. جاراقات العان جاعدايدا دەر كەزىندە مەديسينالىق مەكەمەلەرگە جۇگىنىڭىزدەر»، - دەپ تۇيىندەدى دارىگەر.