43 ەسىرتكى ارناسى جويىلدى.
ماماندار ەسىرتكى جارناماسى بار 1900 سايت بۇعاتتالعانىن ايتتى، دەپ حابارلايدى Almaty-akshamy.kz Baq.kz سىلتەمە جاساپ.
ايتۋىنشا، مەملەكەت باسشىسىنىڭ قابىلداۋىندا بولعان مينيستر احمەتجانوۆ پرەزيدەنتتىڭ الدىندا وسى ماسەلەلەرمەن بولىسكەن.
«پوليسەيلەر زاڭسىز اينالىمنان 12 تونناعا جۋىق ەسىرتكى، ونىڭ ىشىندە 212 كگ سينتەتيكالىق ءتۇرىن تاركىلەدى. 36 ەسىرتكى زەرتحاناسى مەن 43 ەسىرتكى ارناسى جويىلدى، ەسىرتكى جارناماسى بار 1900 سايت بۇعاتتالدى. ءىىم ناشاقورلىققا جانە ەسىرتكى بيزنەسىنە قارسى ءۇش جىلدىق كەزەڭگە ارنالعان كەشەندى جوسپار ازىرلەنىپ جاتىر»، - دەدى ىشكى ىستەر مينيسترلىگىنىڭ وكىلى شۇعىلا تۇرلىبەك.
سونىمەن قاتار ول ادام ساۋداسىنا قارسى زاڭ دايىندالعانىن العا تارتتى.
«سونداي-اق «ادام ساۋداسىنا قارسى ءىس-قيمىل تۋرالى» ارنايى زاڭ ازىرلەندى. كەزدەسۋ قورىتىندىسى بويىنشا مەملەكەت باسشىسى ەلدەگى ازاماتتاردىڭ قاۋىپسىزدىگى مەن قۇقىقتىق ءتارتىپتى قامتاماسىز ەتۋ بويىنشا ءبىرقاتار ناقتى مىندەت قويدى»، - دەدى شۇعىلا تۇرلىبەك.
ەسكە سالا كەتەيىك، بۇعان دەيىن ەل اۋماعىندا 7 كۇندە 3 مىڭنان استام قىلمىس جاسالعانى تۋرالى جازعان بولاتىنبىز. سونىڭ ىشىندە پوليسيا قىزمەتكەرلەرى «ءىزىن سۋىتپاي» 18 كىسى ءولتىرۋدى، 4 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى، 1 قاراقشىلىق، 27 توناۋ جانە 440 بوتەن مۇلىكتى ۇرلاۋ قىلمىستارىن اشقان.