29 قىركۇيەكتە اتالىپ وتەتىن دۇنيەجۇزىلىك جۇرەك كۇنى قارساڭىندا الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا جوعارى ساناتتى كارديولوگ، قالالىق كارديولوگيالىق ورتالىقتىڭ كارديولوگيا بولىمشەسىنىڭ مەڭگەرۋشىسى زۋلفيا ماقاشيەۆانىڭ قاتىسۋىمەن بريفينگ ءوتتى. ساراپشى ءقاۋىپ فاكتورلارى، الدىن الۋ ادىستەرى جانە جۇرەك-قان تامىرلارى اۋرۋلارىن ەرتە دياگنوستيكالاۋدىڭ ماڭىزدىلىعى تۋرالى ايتتى، دەپ حابارلايدى aqshamnews.kz.
جۇرەك-قان تامىرلارى اۋرۋلارىنىڭ دامۋىنىڭ نەگىزگى سەبەپتەرىنىڭ ىشىندە دارىگەر تۇقىم قۋالاۋ بەيىمدىلىگىن، جوعارى قان قىسىمىن، جوعارى حولەستەرين دەڭگەيىن، تەمەكى شەگۋدى، سەمىزدىكتى جانە قوزعالىسى از ءومىر سالتى ەكەنىن اتاپ كورسەتتى.
«بۇل فاكتورلار ميوكارد ينفاركتىسى جانە ينسۋلت سياقتى جۇرەك اۋرۋلارىنىڭ ءقاۋپىن ارتتىرادى. اۋرۋدى اسقىندىرىپ الماۋ ءۇشىن ولاردى باقىلاۋ وتە ماڭىزدى»، - دەپ اتاپ ءوتتى ز.ماقاشيەۆا.
ول سونداي-اق جۇرەك-قان تامىرلارى اۋرۋلارىنىڭ الدىن الۋ ءومىر سالتىن وزگەرتۋدى قاجەت ەتەتىنىن ەسكە سالدى.
«تەمەكى شەگۋدەن باس تارتىپ، تۇزدى ازايتىپ، فيزيكالىق بەلسەندىلىكتى ارتتىرىپ، دۇرىس سالماقتى ساقتاۋ قاجەت. ءتىپتى تاماقتانۋ مەن كۇندەلىكتى رەجيمدەگى ازعانتاي وزگەرىستەردىڭ ءوزى جۇرەك-قان تامىرلارى اۋرۋلارىنىڭ ءقاۋپىن ايتارلىقتاي تومەندەتۋى مۇمكىن»، - دەپ كەڭەس بەردى ول.
ساراپشى سونىمەن قاتار فيزيكالىق بەلسەندىلىكتىڭ جۇرەك دەنساۋلىعى ءۇشىن ماڭىزدىلىعىنا نازار اۋداردى. ونىڭ ايتۋىنشا، تۇراقتى فيزيكالق جاتتىعۋلار جاساۋ جۇرەك-قان تامىرلارى دەنساۋلىعىن ساقتاۋعا كومەكتەسەدى. ول اپتاسىنا كەم دەگەندە 150 مينۋت ءجۇرۋ، ءجۇزۋ نەمەسە ۆەلوسيپەد تەبۋ سياقتى اەروبتى جاتتىعۋلارعا كوڭىل ءبولۋدى ۇسىنادى.
كارديولوگ سونىمەن قاتار تەڭدەستىرىلگەن تاماقتانۋدىڭ ماڭىزىن اتاپ ءوتتى.
«تاماقتانۋ راسيونى تالشىققا، ومەگا-3 ماي قىشقىلدارىنا جانە قانىققان مايعا باي تاعامدار بولۋى كەرەك. بۇل حولەستەريننىڭ قالىپتى دەڭگەيىن ساقتاۋعا جانە جۇرەك اۋرۋلارىنىڭ الدىن الۋعا كومەكتەسەدى»، - دەپ تولىقتىردى ول.
دارىگەر قازاقستاندا بەلسەندى جۇمىس ىستەيتىن زاماناۋي سكرينينگتىك باعدارلامالار اۋرۋلاردى ەرتە كەزەڭدە انىقتاۋعا كومەكتەسەتىنىن اتاپ ءوتتى.
«سكرينينگتىك تەكسەرۋلەر اۋرۋدى ەرتە كەزەڭدە نەمەسە وعان بەيىمدىلىكتى انىقتاۋعا، وڭتايلى ەمدەۋدى تاڭداۋعا جانە الدىن الۋ شارالارىنىڭ كەشەنىن تاعايىنداۋعا كومەكتەسەدى. ارتەريالىق گيپەرتونيا مەن جۇرەكتىڭ يشەميالىق اۋرۋىن ەرتەرەك انىقتاۋعا 40 جاستان اسقان، 2 جىلدا 1 رەت، وسى اۋرۋ بويىنشا ديسپانسەرلىك ەسەپتە تۇرمايتىن ەرلەر مەن ايەلدەر شاقىرىلادى»، - دەپ قورىتىندىلادى ز.ماقاشيەۆا.
وكق سپيكەرىنىڭ مالىمەتىنشە، 2024 جىلى الماتىدا 145 979 ادام سكرينينگتىك تەكسەرۋدەن ءوتتى، بۇل 9 992 پاسيەنتتە جۇرەك اۋرۋىن ەرتە ساتىسىندا انىقتاۋعا مۇمكىندىك بەردى.