10-13 شىلدەدە قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى م.قارابايەۆ باستاعان قازاقستاندىق بيزنەس دەلەگاسياسى ەكاتەرينبۋرگتە (رەسەي) وتكەن «تۇراقتى ءوندىرىس. جاڭارۋ ستراتەگياسى» «يننوپروم – 2023» ونەركاسىپتىك كورمەسىنىڭ نەگىزگى ستراتەگيالىق سەسسياسىنا قاتىستى، دەپ حابارلايدى Almaty-akshamy.kz.
بيىلعى جىلى ەڭ ءىرى حالىقارالىق كورمەگە 35 مەملەكەت قاتىستى. شارانىڭ سەرىكتەس ەلى بەلارۋس رەسپۋبليكاسى بولدى. ءداستۇرلى حالىقارالىق ونەركاسىپ كورمەسىنىڭ اياسىندا «رەسەي – قازاقستان ونەركاسىپ كووپەراسياسى» تاقىرىبىنا ارنالعان پانەلدى سەسسياسىندا ءسوز العان قازاقستان رەسپۋبليكاسى سىرتقى ىستەر مينيسترلىگىنىڭ باسشىسى ونەركاسىپتىك ارىپتەستىكتى دامىتۋدىڭ ءتيىمدى الاڭىنا اينالعان يننوپروم كورمەسىنىڭ ماڭىزدىلىعىن اتاپ ءوتتى.
«رەسەي – قازاقستان» بىرلەسكەن جوبالارىن جۇزەگە اسىرۋعا باعىتتالعان سەرىكتەستىكتى كەڭەيتۋ اياسىندا الماتىنىڭ «الماتى بيزنەس دامۋ كومپانياسى» كاسىپكەرلىكتى دامىتۋ كومپانياسىنىڭ باسشىلىعى 30-دان استام رەسەيلىك كومپانيالارمەن كەلىسسوزدەر جۇرگىزىپ، وندىرىستىك كووپەراسيا قۇرۋ ماسەلەلەرىن تالقىلادى. «الاتاۋ» اتپ ارنايى ەكونوميكالىق ايماعى مەن الماتى قالاسىنىڭ يندۋستريالدى ايماعىنىڭ اۋماعىندا جاڭا ءوندىرىس ورىندارىن نەگىزگە الا وتىرىپ، وندىرىستىك كووپەراسيانى قۇرۋ ماسەلەلەرى كوتەرىلدى. قازاقستان ورتا ۋرال ءۇشىن ماڭىزدى سىرتقى ساۋدا سەرىكتەستەرىنىڭ ءبىرى بولىپ تابىلادى، تاۋار اينالىمى بويىنشا رەسپۋبليكامىز قىتايدان كەيىن ەكىنشى ورىندا تۇر. ۋرال ولكەسىندەگى يننوپروم-عا قاتىسۋ تاراپتار اراسىنداعى ىنتىماقتاستىق پەن ىسكەرلىك بايلانىستى ىنتالاندىرادى جانە نىعايتا تۇسەدى.
كورمە وتكەن جىلدار ىشىندە مىڭداعان قازاقستاندىق جانە رەسەيلىك تاۋار وندىرۋشىلەر ەكىجاقتى بايلانىس ورناتىپ، ونەركاسىپ سالاسىندا جاڭا جوبالاردى جۇزەگە اسىردى.
حالىقارالىق ونەركاسىپ كورمەسى بىرلەسكەن جوبالاردى جۇزەگە اسىرۋعا، ارىپتەستىك بايلانىستاردى كەڭەيتۋگە، ونەركاسىپتى دامىتۋدىڭ وزەكتى باعىتتارىن اشۋعا، سونداي-اق بۇرىننان بار ىسكەرلىك بايلانىستاردى نىعايتۋعا جانە دامىتۋعا باعىتتالعان ايماقتاعى كوممەرسيالىق جانە ونەركاسىپتىك ىنتىماقتاستىقتىڭ نەگىزگى وقيعاسى بولىپ تابىلادى.