19 شىلدەگە دەيىن ءبىلىم گرانتىن تاعايىنداۋ كونكۋرسىنا 83 مىڭ ءوتىنىش كەلىپ ءتۇستى.
تالاپكەرلەردىڭ باسىم بولىگى قۇجاتىن ءۇش رەسپۋبليكالىق ماڭىزى بار قالانىڭ جوعارى وقۋ ورىندارىنا تاپسىرىپ جاتىر: الماتى (34 مىڭ)، استانا (16 مىڭ) جانە شىمكەنت (5 مىڭ)، دەپ حابارلايدى Almaty-akshamy.kz قازاقپاراتقا سىلتەمە جاساپ.
تالاپكەرلەردىڭ تاڭداۋى ىشىندە ەڭ سۇرانىسقا يە باعىتتار قاتارىندا «پەداگوگيكالىق عىلىمدار» (22 مىڭ)، «ينجەنەرلىك، وڭدەۋ جانە قۇرىلىس سالالارى» (16 مىڭ) جانە «اقپاراتتىق-كوممۋنيكاسيالىق تەحنولوگيالار» (11 مىڭ) قالىپ وتىر. ءبىلىم بەرۋ باعدارلامالارىنىڭ توبىنا كەلەتىن بولساق، ەڭ كوپ ءوتىنىش «اقپاراتتىق تەحنولوگيالار» - 9 مىڭ.
ارى قاراي «دەنە شىنىقتىرۋ مۇعالىمدەرىن دايارلاۋ» - 5 مىڭ ءوتىنىش كەلىپ تۇسكەن. ءۇشىنشى ورىندا «مەديسينا»، ونى 4 مىڭ تالاپكەر تاڭداعان. ەستەرىڭىزگە سالا كەتسەك، 20 شىلدە - گرانت كونكۋرسىنا ءوتىنىش قابىلداۋدىڭ سوڭعى كۇنى. قۇجاتتاردى قابىلداۋ ەGov ارقىلى ونلاين فورماتتا نەمەسە جوو-لاردىڭ قابىلداۋ كوميسسيالارى ارقىلى وفلاين فورماتتا جۇزەگە اسادى. سونداي-اق، جوو-دا ۆيرتۋالدى قابىلداۋ كوميسسياسى جۇمىس ىستەيدى. قۇجاتتاردى كەز كەلگەن جوو (ورنالاسقان جەرى بويىنشا) ارقىلى تاپسىرۋعا بولادى.