قازاقستان پوليسياسىنىڭ قۇرىلعانىنا 33 جىل تولۋىنا ارنالعان يميدجدىك جانە يدەولوگيالىق ايلىق اياسىندا الماتى قالاسى پوليسيا دەپارتامەنتىندە بالالارعا تانىمدىق ەكسكۋرسيا ۇيىمداستىرىلدى.
الماتىلىق 25 بالا قۇقىق قورعاۋ سالاسىنا قىزىقتى ساياحات جاساپ، پد-نىڭ جەدەل باسقارۋ ورتالىعىنا باردى، دەپ حابارلايدى aqshamnews.kz Polisia.kz-كە سىلتەمە جاساپ.
مۇندا ولارعا تاۋلىك بويى ازاماتتاردان قوڭىراۋلار قالاي قابىلداناتىنى، پوليسيا جاساقتارىنىڭ جەدەل ارەكەت ەتۋى جانە زاماناۋي تەحنولوگيالاردىڭ قوعامدىق قاۋىپسىزدىكتى قامتاماسىز ەتۋدەگى ءرولى كورسەتىلدى. سودان كەيىن بالالار دەپارتامەنت مۇراجايىنا بارىپ، الماتىلىق پوليسيانىڭ كوپجىلدىق تاريحىمەن، ەرلىك جولىمەن، ۇرپاقتار ساباقتاستىعىمەن جانە پوليسيا قىزمەتىنىڭ قوعام ومىرىندەگى ماڭىزدىلىعىمەن تانىستى.
- مۇنداي شارالار بالالار ءۇشىن جاي عانا ەكسكۋرسيا ەمەس. بۇل – زاڭعا، مەملەكەتكە جانە قوعامدىق ءتارتىپتى كۇزەتىپ جۇرگەن ادامدارعا دەگەن قۇرمەتتى تاربيەلەۋدىڭ ماڭىزدى بولىگى. ءبىز ءوسىپ كەلە جاتقان ۇرپاق پوليسيا تۋرالى جاي عانا بىلمەي، ونى قورعاۋشى رەتىندە سەزىنىپ، سەنىپ، قۇرمەتتەي بىلگەنىن قالايمىز، – دەدى الماتى قالالىق پد جەرگىلىكتى پوليسيا قىزمەتى باسقارماسى يۋۆەنالدىق پوليسيا ءبولىمىنىڭ باستىعى جاننا شونجانوۆا.
الماتى قالالىق پوليسيا دەپارتامەنتى ءىىم جاريالاعان پروفيلاكتيكا جىلى اياسىندا مەكتەپ وقۋشىلارى مەن جاسوسپىرىمدەرگە ارنالعان اشىق ءىس-شارالاردى وتكىزۋدى جالعاستىرادى