تاۋداعى «جاس سارباز» لاگەرىندە اسكەري-پاتريوتتىق كلۋبتاردىڭ 75 تاربيەلەنۋشىسى تاۋ ءتۋريزمى مەن الپينيزم داعدىلارىن يگەرۋ ماقساتىمەن وقۋدان ءوتتى.
«جاس سارباز» لاگەرى الماتى قالاسىنىڭ قورعانىس ىستەرى جونىندەگى جانە الماتى وبلىسىنىڭ شەكارا قىزمەتى دەپارتامەنتتەرىنىڭ باستاماسىمەن قۇرىلعان، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
بالالار ۇلكەن الماتى (3 680 مەتر)، تۋريست (3 890 مەتر) جانە ساتپايەۆ شىڭدارىنا (بۇرىنعى كەڭەس شىڭى) (4 317 مەتر) كوتەرىلىپ، ەلىمىزدىڭ كوك تۋىن جەلبىرەتتى. سونىمەن بىرگە ولار مەملەكەتتىك شەكارانىڭ پەريمەترى بويىنشا ءجۇرىپ ءوتىپ، ۇلكەن الماتى كولى شاتقالى مەن پروحودنوە شاتقالىنا جورىق جاسادى. وسىلايشا، ىلە-الاتاۋى ۇلتتىق پاركىنىڭ گەوگرافياسىمەن تانىسقان بالالار قورىقتىڭ سۇلۋلىعىنا ءتانتى بولدى.
– لاگەرلىك جيىنعا قاتىسۋشىلار فەسەنكوۆ اتىنداعى وبسەرۆاتورياعا بارىپ، عارىشتىق بايلانىس تورابىنىڭ جۇمىسىمەن دە تانىستى. سونىمەن بىرگە بالالار «الما-اراسان» شەكارا زاستاۆاسىنا ەكسكۋرسيا جاساپ، شەكارا قىزمەتى اكادەمياسىنىڭ شاتىرلى لاگەرىندە بولدى. كۋرسانتتار كىشكەنتاي قوناقتارعا كونسەرت ۇيىمداستىرىپ، مەرەكەلىك داستارحان جايدى، – دەدى جاساربازشىلاردىڭ جەتەكشىسى باقىتجان پەرىمبەتوۆ.
ترەنينگتەر مەن باسقا دا ءىس-شارالاردى وتكىزۋگە الماتى قالاسىنىڭ قورعانىس ىستەرى جونىندەگى دەپارتامەنتى مەن «جيۆايا ۆسەلەننايا» جەكەمەنشىك مەكتەبى كومەكتەستى. ال ق ر ۇقك الماتى وبلىسى بويىنشا شەكارا قىزمەتى دەپارتامەنتى، «جاس سارباز» اسكەري-پاتريوتتىق كلۋبى، № 95 جالپى ءبىلىم بەرەتىن مەكتەبى جيىننىڭ نەگىزگى ۇيىمداستىرۋشىلارى بولدى. ودان بولەك استانا، قاراعاندى، تاراز قالالارىنان دا بالالار مەن اتا-انالار كوميتەتىنىڭ وكىلدەرى كەلدى.
الداعى ۋاقىتتا لاگەر تاعى 100-دەن استام بالانى قابىلداپ، 15 تامىزدا ماۋسىمدى اياقتاۋدى جوسپارلاپ وتىر.