اسكەري قىزمەتشىلەر 97 جاستاعى سوعىس ارداگەرىن تۋعان كۇنىمەن قۇتتىقتادى.
قالالىق قورعانىس ىستەرى جونىندەگى دەپارتامەنتى، جەتىسۋ اۋداندىق باسقارماسىنىڭ وكىلدەرى جانە دەسانتتىق-شابۋىلداۋ اسكەرلەرى 68602 اسكەري ءبولىمىنىڭ اسكەري قىزمەتشىلەرى مايدانگەرگە اقجارما تىلەكتەرىن ارنادى. ارداگەرلەر كەڭەسىنىڭ وكىلدەرى مەن اسكەري قىزمەتشىلەردىڭ وتباسى مۇشەلەرىمەن جۇمىستى ۇيىمداستىرۋ جونىندەگى قىزمەت باسشىسى اقمارال دايىربەكوۆا ارداگەرگە زور دەنساۋلىق جانە ۇزاق عۇمىر تىلەدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
يليا كۋدين 1927 جىلى الماتى وبلىسىنىڭ كەربۇلاق اۋدانىندا دۇنيەگە كەلگەن. مايدانعا 1944 جىلدىڭ سوڭىندا تالدىقورعان وبلىسىنان شاقىرىلعان ول ارتيللەريادا قىزمەت ەتتى. گيتلەرلىك گەرمانيا تىزە بۇككەننەن كەيىن ونى جاپوندارعا قارسى قيمىلدارعا قاتىسۋ ءۇشىن قيىر شىعىسقا جىبەرەدى. يليا گريگوريەۆيچ تۋعان جەرگە جەتى جىلدان كەيىن عانا ورالدى.
زەينەتكەرلىككە شىققانعا دەيىن ارداگەر مەحانيزاتور بولىپ جۇمىس ىستەدى. ەڭبەگى ءۇشىن II دارەجەلى "وتان سوعىسى" وردەنىمەن جانە «1941-1945 جىلدارداعى ۇلى وتان سوعىسىنداعى ەرەن ەڭبەگى ءۇشىن» مەدالىمەن ماراپاتتالعان. يليا گريگوريەۆيچتىڭ اۋلەتىندە اتاسىن ماقتان تۇتاتىن سەگىز نەمەرەسى جانە كوپتەگەن شوبەرەلەرى بار.
مايدانگەر قۇتتىقتاۋلار مەن سىيلىقتاردى قۋانا قابىلداپ، سوعىس جىلدارىنداعى ەستەلىكتەرىن ورتاعا سالدى. ول ءجاسوسپىرىم كەزىندە تۋىستارىن مايدانعا قالاي شىعارىپ سالعانىن، جولداستارىن جوعالتقانىن، ءبىراق ءۇمىتىن ۇزبەگەنى جايلى ايتتى.
ءوز كەزەگىندە يليا گريگوريەۆيچ بەيبىتشىلىك ءۇشىن جان قيعان جانداردى جادىندا ساقتاپ، ىزەت كورسەتىپ جۇرگەن اسكەري قىزمەتشىلەرگە العىس ءبىلدىردى.