اتىراۋ وبلىسى ماحامبەت اۋدانى بەيبارىس اۋىلىندا ورنالاسقان سارىوزەك كانالىنان 520 مىڭنان استام بالىق شاباقتارى قۇتقارىلدى.
ەستەرىڭىزگە سالا كەتەيىك، كوكتەمگى سۋ تاسقىنى سالدارىنان جايىق وزەنى ارناسىنان شىعىپ، وزەن سۋى توگىلگەن جەرلەر ارقىلى سارىوزەك ارناسىنا تۇسكەن بولاتىن. تاسقىن سۋلارمەن بىرگە ارناعا بالىق شاباقتارى تۇسكەن. ماۋسىم ايىندا جايىق وزەنىندەگى سۋ دەڭگەيى تۇراقتاندى، ال تاسقىن سۋ توگىلىپ ارنادا وسكەن بالىق شاباقتارىمەن بىرگە جينالىپ قالعان.
قازىرگى ۋاقىتتا ارنادا جينالعان بالىق شاباقتارىن ساقتاپ قالۋ ءۇشىن سۋ بەرۋ ناسوسى ارقىلى سۋ جىبەرىلۋدە جانە بالىق شاباقتارىن قۇتقارۋ جۇمىستارى جالعاسۋدا، دەپ حابارلايدى aqshamnews.kz اشم سايتىنا سىلتەمە جاساپ.
ءىس-شاراعا جايىق-كاسپيي وبلىسارالىق باسسەيندىك بالىق شارۋاشىلىعى ينسپەكسياسى، جەرگىلىكتى اتقارۋشى ورگاندار، بالىق شارۋاشىلىعى سۋبەكتىلەرىنىڭ وكىلدەرى، جەرگىلىكتى تۇرعىندار، ەرىكتىلەر جانە بلوگەرلەر قاتىسۋدا.
قۇتقارىلعان بالىق شاباقتارىنىڭ تۇرلەرى: سازان، تابان، كوكسەركە، جايىن، موڭكە، ورتاشا سالماعى 12-14 گرامم.
ايتا كەتەيىك، 2024 جىلدىڭ ماۋسىمىنان باستاپ قازىرگى ۋاقىتقا دەيىن اتىراۋ وبلىسىنىڭ سۋ ايدىندارىندا 49 ملن. 920 مىڭنان استام بالىق شاباقتارى، ونىڭ ىشىندە قۇرمانعازى اۋدانىنىڭ اۋماعىندا – 39 ملن. 900 مىڭ دانا، يندەر اۋدانىنىڭ اۋماعىندا – 8 ملن. 500 مىڭ دانا، ماحامبەت اۋدانىندا – 1 ملن. 520 مىڭ دانا، اتىراۋ قالاسىنىڭ وبلىس ورتالىعىندا - 35،5 مىڭ دانا بالىق شاباقتارى قۇتقارىلدى.
بولشەكتەنگەن سۋ ايدىندارىنان قۇتقارىلعان بارلىق بالىق شاباقتارى جايىق وزەنىنە ءتىرى تۇردە جىبەرىلۋدە.