گاز قۇبىرىن جوندەيتىن سلەسارلار مەن تەحنيكتەر 90 مىڭ تەڭگە جالاقى اي سايىنعى ازىق-تۇلىكتەن ارتىلمايدى دەپ قىنجىلدى.
«الماتىگاز» ابونەنتتىك ەسەپتەۋ ورتالىعىنىڭ 100-گە جۋىق مامانى ايلىقتى كوتەرۋدى تالاپ ەتىپ، نارازىلىق ءبىلدىردى، دەپ حابارلايدى Almaty-akshamy.kz.
كتك تەلەارناسىنىڭ اقپاراتىنا سايكەس، جۇمىسشىلار جول شىعىنى مەن قۇرال-سايماندى ساتىپ الۋ ءۇشىن دە ءوز قالتاسىنان قاراجات شىعارادى ەكەن.
«بىزگە ءتورت اي بولدى. وسىلاي جينالامىز. قويا تۇرىڭدار دەيدى. تاعى ءبىر اي ۋاقىت بەرىڭدەر دەيدى. ءبىز ءبىر اي ۋاقىت كۇتىپ شارشادىق. ايلىعىمىز نەسيەمىزگە جەتپەيدى. تاماق، بالا-شاعا بار. اناۋ-مىناۋ تولەيتىنىمىز بار. جاعدايىمىز جەتپەي جاتىر. جولىمىزعا تولەمەيدى. جەكە كولىك بەرمەيدى. ءوزىمىزدىڭ كولىكپەن اقشا قۇيىپ بارامىز ۇيلەرگە»، - دەيدى سلەسار ەلامان ءجانابىل.
تاۋى شاعىلعان جۇمىسشىلار تاڭنان قارا كەشكە دەيىن الماتىداعى ۇيلەردى ارالاپ، گاز قۇبىرىن جوندەيدى، تەكسەرەدى، اقاۋ شىقسا، قالپىنا كەلتىرەدى. وعان قوسا سان ءتۇرلى قۇجات تولتىرۋ مىندەتى دە وسى سلەسارلار مەن تەحنيكتەردىڭ موينىنا جۇكتەلگەن. قاعازباستىلىقتان شارشاعان جۇمىسشىلار جول شىعىنىنان بولەك قاجەتتى قۇرال-سايماندى دا ءوز قاراجاتىمىزعا ساتىپ الامىز دەپ كەيىدى.
تەلەارنا مالىمەتىنشە، ۇيلەرىنە كوگىلدىر وتىن تارتقان تۇرعىندارعا قىزمەت كورسەتەتىن ماماندار توز-توزى شىققان عيماراتتا وتىرادى.
«كۇن تارتىبىنە ەڭبەكاقىنى كوتەرۋ، جۇمىس ىستەۋگە ىڭعايلى جاعداي جاساۋ ماسەلەسىن قويدىق. مەنىڭ ويىمشا، 15 كۇندە ناقتى شەشىمدەر قابىلداي باستايمىز. بارلىعى رەتىمەن بولادى. بيۋدجەت نەگىزى بولىنگەن. ءبىراق قارجىنى قايتا ءبولۋ كەرەك بولسا، ونى دا قاراستىرامىز»، - دەدى Qazaq Billing كومپانياسىنىڭ اتقارۋشى ديرەكتورى دميتريي ماحروۆ.
ءتورت ايدان بەرى تالابىمىز ورىندالمادى دەگەن جۇمىسشىلار تۇيتكىلدىڭ ءتۇيىنى 15 كۇندە تارقايدى دەگەنگە سەنبەيدى. گاز ماماندارى "ۋادە ەتىلگەن مەرزىمدە ماڭداي تەر اقىمىز كوتەرىلمەسە، اشتىق جاريالاپ، نارازىلىق شاراسىن جالعاستىرامىز" دەپ تارقاستى.