قالاداعى بارلىق زاقىمدالعان كامەرالار مەن جابدىقتار قالپىنا كەلتىرىلدى
الماتىعا قوسىمشا تاعى ءۇش مىڭ بەينەكامەرا قويىلادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بۇرىن حابارلانعانداي، 2022 جىلعى 4-7 قاڭتار ارالىعىندا جاپپاي تارتىپسىزدىكتەر كەزىندە 75 “سەرگەك” كەشەنى، بۇل 304 بەينەكامەرا، سونداي-اق، رترك عيماراتىندا ورنالاسقان ورتالىق بايلانىس ورتالىعى، انتەننا جانە جەلىلىك جابدىق ىستەن شىقتى. بارلىق زاقىمدالعان كامەرالار مەن جابدىقتار قالپىنا كەلتىرىلدى.
جەكە توبج ارنالارىنا قوسىلۋعا ارنالعان جەكە جۇيەسى بار 1 103 كامەرانى قامتيتىن “بەينەباقىلاۋ جۇيەلەرى” جوباسى بويىنشا جاپپاي تارتىپسىزدىكتەر كەزىندە 283 كامەرا، سونداي-اق شكافتار مەن تاراتۋ جابدىقتارى ىستەن شىققان. قازىرگى ۋاقىتتا بەينەكامەرالار مەن زاقىمدالعان قوندىرعىلار قالىپتى جۇمىس ىستەپ تۇر.
«الداعى ۋاقىتتا ءۇش مىڭ بەينەباقىلاۋ كامەراسى ورناتىلادى. قالا تۇرعىندارىنىڭ قاۋىپسىزدىك شارالارىن ۇيىمداستىرۋدىڭ ماڭىزدى جوباسى ءبىرىڭعاي بەينەباقىلاۋ جۇيەسى بولماق. ەگەر بۇرىن تەك جول قوزعالىسى قاۋىپسىزدىگىنىڭ جاي-كۇيى پد جبو ارقىلى باقىلاناتىن بولسا، 2020 جىلدان باستاپ ورتالىقتىڭ مارتەبەسىنە ازاماتتاردىڭ كوپ جينالاتىن جەرلەرىندەگى، اۋلالارداعى جانە اۋلالارعا، پوليسيا پۋنكتتەرىنە ىرگەلەس اۋماقتارداعى قوزعالىستى باقىلاۋ ەنە باستادى. الداعى 2 جىلدا قالاداعى بارلىق جاعدايدى كورۋ ءۇشىن كامەرالاردى ساۋدا ورتالىقتارىمەن جانە باسقا دا جەكە مەنشىك نىساندارىمەن بىرىكتىرۋدى جوسپارلاپ وتىرمىز»، – دەدى الماتى قالالىق پد اقپاراتتاندىرۋ جانە بايلانىس باسقارماسىنىڭ باستىعى ولگا اگافونوۆا.