الماتىدا وتەتىن «قايرات» – «رەال مادريد» ماچىن تاماشالاۋ ءۇشىن 26-29 قىركۇيەك ارالىعىندا 5 مىڭنان استام شەتەلدىك قوناق كەلدى، - دەپ حابارلايدى Aqshamnews.kz.
قازاقستاننىڭ وزگە وڭىرلەرىنەن كەلگەن جانكۇيەرلەرمەن بىرگە جالپى كورەرمەن سانى ونداعان مىڭ ادامعا جەتتى. بۇل تۋرالى الماتى قالاسى تۋريزم باسقارماسى «e-Qonaq» اقپاراتتىق جۇيەسىنىڭ دەرەكتەرىنە سىلتەمە جاساپ حابارلادى.
نەگىزگى تۋريستەر لەگى جۇڭگو، ءۇندىستان، رەسەي، قازاقستاننىڭ باسقا وبلىستارىنان، سونداي-اق جاپونيا، ۇلىبريتانيا، يسپانيا، چەحيا، تمد جانە وزگە دە ەۋروپا مەملەكەتتەرىنەن كەلگەن.
ماچتىڭ ەكونوميكالىق اسەرى ايتارلىقتاي جوعارى بولماق. Mastercard كومپانياسىنىڭ مالىمەتىنشە، الماتىعا كەلگەن شەتەلدىك ءتۋريستىڭ ورتاشا شىعىنى شامامەن 1 500 اقش دوللارىنا جەتەدى. بۇل قارجىعا قوناق ۇيدە تۇرۋ، تاماقتانۋ، كولىك، ويىن-ساۋىق پەن ساۋدا كىرەدى. مۇنداي شىعىندار شاعىن جانە ورتا بيزنەستىڭ دامۋىنا سەرپىن بەرىپ، قىزمەت كورسەتۋ سالاسىن جانداندىرادى ءارى قالا ەكونوميكاسىنا مۋلتيپليكاتيۆتى اسەر ەتەدى.
