الماتىدا "ءقاۋىپسىز جول" رەسپۋبليكالىق جەدەل-پروفيلاكتيكالىق ءىس-شاراسى بارىسىندا پوليسەيلەر جول قوزعالىسى ەرەجەسىن ورەسكەل بۇزعان موپەد جۇرگىزۋشىسىن توقتاتتى.
ەر ادام ءتارتىپ ساقشىلارىنىڭ زاڭدى تالابىن ورىنداۋدان باس تارتىپ، قاشۋعا ارەكەتتەنگەنىمەن، كوپ ۇزاماي ۇستالدى، - دەپ حابارلايدى Aqshamnews.kz.
مەديسينالىق كۋالاندىرۋ ناتيجەسىندە ونىڭ ەسىرتكىلىك ماس كۇيدە بولعانى انىقتالدى. جينالعان ماتەريالدار سوتقا جولدانىپ، قۇقىق بۇزۋشى كولىك جۇرگىزۋ قۇقىعىنان ايىرىلىپ، اكىمشىلىك قاماۋعا الىناتىن بولادى. ال موپەد ايىپتۇراعىنا قويىلدى.
– مۇنداي جاعدايلارعا جول بەرۋگە بولمايدى. ءاربىر جۇرگىزۋشى جولداعى قاۋىپسىزدىك ءۇشىن ءوز جاۋاپكەرشىلىگىن سەزىنۋى ءتيىس. ماس كۇيدە كولىك باسقارۋ – ادامداردىڭ ءومىرى مەن دەنساۋلىعىنا تىكەلەي ءقاۋىپ توندىرەدى. الماتى پوليسياسى مۇنداي قۇقىق بۇزۋشىلىقتارعا قاتاڭ شارا قولدانادى. "زاڭ مەن ءتارتىپ" قاعيداتى ءبىزدىڭ جۇمىسىمىزدىڭ نەگىزگى ۇستانىمى بولىپ قالا بەرەدى، – دەدى ناۋرىزباي اۋداندىق پوليسيا باسقارماسىنىڭ باستىعى ديدار جاقىپبايەۆ.