الماتى سيركىندە جاڭا قويىلىم بولادى دەگەندى ەستي سالا، بالالارىن جەتەكتەگەن اتا-انا اباي داڭعىلىنداعى سيرك عيماراتىنا اعىلادى. ويتكەنى، سيرك – بالانى دا، ءتىپتى ەرەسەك ادامدى دا باۋراپ الاتىن، قيال الەمىنە سامعاتاتىن ساحنا ونەرىنىڭ ەڭ تارتىمدىسى. بۇل جولى شاھارىمىزعا رەسەيدەن اتى اڭىزعا اينالعان يۋريي نيكۋليننىڭ سيركى كەلدى.
بيىل يۋريي ۆلاديميروۆيچ نيكۋليننىڭ 100 جىلدىعى. ول – ميلليونداعان ادامنىڭ كۋميرىنە اينالعان ۇلى اكتەر، كىشكەنتاي كورەرمەندەردىڭ جۇرەگىن جاۋلاعان ەڭ تانىمال كۇلدىرگى كلوۋن.
بەلگىلى سيرك جانە كينو اكتەرى يۋريي نيكۋلين ءومىرىن ونەرگە ارناعان جان. ول 1949 جىلدان باستاپ ماسكەۋ سيركىندە ميحايل شۋيدينمەن دۋەت بولىپ كلوۋنادا جانرىندا قىزمەت ەتتى. اكتەردىڭ جارى تاتيانا نيكۋلينا دا - سيرك اكتريساسى. 1983 جىلدان باستاپ نيكۋلين «سۆەتنوي بۋلۆارداعى» ماسكەۋ سيركىنىڭ ديرەكتورى بولىپ تاعايىندالدى. سوناۋ 1880 جىلى نەگىزى قالانعان «سۆەتنوي بۋلۆارداعى» ماسكەۋ سيركىنە 1996 جىلدىڭ جەلتوقسانىندا اكتەردىڭ 75 جىلدىق مەرەيتويىنا وراي نيكۋليننىڭ ەسىمى بەرىلدى. اكتەر ومىردەن وتكەن سوڭ، سيركتى بالاسى ماكسيم نيكۋلين باسقاردى. سيرك كۇنى بۇگىنگە دەيىن كورەرمەننىڭ كوڭىلىن كوتەرىپ، كوپشىلىكتىڭ ىقىلاسىنا بولەنىپ كەلەدى.
نيكۋلين سيركىنىڭ دارىندى ارتيستەرىنىڭ عاجاپ ونەرىنىڭ ارقاسىندا بۇل ۇجىم الەمنىڭ ەڭ قىزىق دەگەن سيركتەرىنىڭ قاتارىنا ەنگەن. ىرگەتاسى قالانعان ساتتەن-اق مۇندا كەلگەن كورەرمەن ۇيدەگىدەي جايلىلىق پەن جىلىلىقتى سەزىنەدى. ونەر ورداسىنىڭ كوپتەگەن ساحنالىق نومەرلەرى تەاترلاندىرىلعان شوۋعا نەگىزدەلەدى جانە سيرك باعدارلاماسىنىڭ سان الۋاندىعىمەن ەرەكشەلەنەدى.
الماتىداعى سيرك قويلىمىندا نيكۋلين سيركىنىڭ بەلگىلى اكتەرى، سايقىمازاق ارتاك ارۋتيۋنيان بالاسى نيكيتامەن بىرگە مانەجگە شىعا سالىسىمەن، كورەرمەندەردى كۇلكىگە قارىق قىلدى. ارتاكتى جۇرت «مەرەكە-ادام» دەپ تەككە اتاماسا كەرەك. ول ءوزىنىڭ تارتىمدى قىلىعىمەن، ادەمى قيمىلدارىمەن، كۇلكىلى ارەكەتتەرىمەن كوپشىلىكتى ءتانتى ەتتى. اكەسى مەن بالاسى زالداعى كورەرمەندەردى دە ساحناعا شىعارىپ، كەرەمەت شوۋ جاساپ، ەستەن كەتپەس كوڭىل-كۇي سىيلادى.
سيركتەگى اكروباتتار مەن اۋە گيمناستارىنىڭ ونەرىنە تاڭقالماسقا شارا جوق. اتاقتى گيمناست اناستاسيا دەميدوۆا الەمدە ەشكىم قايتالاي المايتىن تريۋكتەردى ەش ساقتاندىرۋسىز ورىنداعاندا، دەمىڭدى ىشكە تارتىپ تاماشالايسىڭ. ول ءوزىنىڭ 15 جاسىندا مونتە-كارلوداعى سيرك ارتيستەرى فەستيۆالىندە كۇمىس جۇلدەگەر اتانعان.
كاسىبي جونگلەر كريستينا گۋكتىڭ ساقينالاردى قولىنان تۇسىرمەي اينالدىرۋ شەبەرلىگى، يكەمدىلىگى كەرەمەت. ونىڭ ەش تىرەۋسىز تۇرعان ساتىعا شىعىپ ونەر كورسەتۋى ۇلكەندى دە، كىشىنى دە تاڭ-تاماشا قالدىردى.
ولگا گيەۆوركياننىڭ ارتيستىك شوۋى دا وزىنشە عاجاپ. ول سيرك تريۋكتارىن كوركەم حورەوگرافيا جانە اسەم مۋزىكانىڭ سۇيەمەلدەۋىمەن ورىندايدى. ال سۆەجوۆتار دۋەتىنىڭ شەبەرلىگى ونەردىڭ شىڭى دەرسىز. ولار اۋەدە ساقتاندىرۋسىز كوركەم تريۋكتار جاسايدى. ارتيستەردىڭ فيزيكا زاڭدىلىعىن بۇزاتىن كورىنىستەرىن تاماشالاعاندا ەرتەگىدەگى كوك الەمىنە ساياحات جاساعانداي اسەر الاسىز. سونداي-اق، رۋسلان ءفايزۋليننىڭ «باتىلدىق دوڭگەلەگى» اتتى تاڭعاجايىپ شوۋىنداعى ەكسترەمالدى تريۋكتەردى كورگەندە، ادامنىڭ مۇمكىندىكتەرىندە شەك جوقتىعىنا كوز جەتكىزە تۇسەسىز. سيرك ارتيستەرىنىڭ بويىنداعى قايسارلىق پەن باتىلدىققا كورەرمەن باس يەدى. ويتكەنى، ولاردىڭ ادامعا سىيلايتىن ەموسياسىن، اسەرىن سوزبەن جەتكىزۋ مۇمكىن ەمەس. ءقاۋىپتى، ءبىراق عاجاپ ونەردىڭ تارلاندارى حالىقتىڭ «براۆو» دەگەن قيقۋىنان قۋات الادى.
سيرك جانۋارلارسىز قىزىق بولا ما؟ نيكۋلين سيركىندە مىڭ بۇرالعان گيمناستاردان، يكەمدى اكروباتتار مەن جونگلەرلاردان، بيشىلەردەن بولەك، قوڭىر ايۋلاردىڭ ونەرى بالالار ءۇشىن وتە قىزىق كورىنىس بولدى. ەسىمدەرى كوپشىلىككە تانىمال ايۋ جاتتىقتىرۋشىلارى كۋدرياۆسيەۆتەردىڭ شاكىرتتەرى تاماشا ونەر كورسەتتى. قوڭىر ايۋلار ساحنادا دوپ ويناپ، ساقينا اينالدىردى، ەڭ قىزىعى، ولار ۆەلوسيپەدتى، ءتىپتى كولىكتى كەرەمەت جۇرگىزەدى ەكەن. قورباڭداعان سۇيكىمدى ارتيستەر كورەرمەندەردىڭ قوشەمەتىنە بولەندى.
الديار، 10 جاستاعى كورەرمەن:
– ماعان سيرك قاتتى ۇنادى. اسىرەسە، اۋە اكروباتتارىنىڭ تريۋكتارىنا قىزىقتىم. ولار ارقانمەن جوعارى قاراي جۇرگەندە قۇلاپ كەتەتىن سەكىلدى، سونداي قورقىنىشتى. ءبىراق ولار وزدەرىن ەركىن ۇستايدى. سيرك ارتيستەرى باتىر ەكەن.
لەنا، 7 جاستاعى كورەرمەن:
– مەن ناستيا دەميدوۆا سەكىلدى گيمناست بولعىم كەلەدى. ول وتە ادەمى قىز. ونىڭ اۋەدە قالىقتاپ بيلەگەنى وزىنە سونداي جاراسادى. ناستيا مەنىڭ ۇستازىم بولسا عوي دەپ ارماندايمىن. سيرككە ۇنەمى كەلگىم كەلىپ تۇرادى.
ارداق، كورەرمەن:
- يۋريي نيكۋليننىڭ فيلمدەرىن بالا كەزىمىزدەن كورىپ وستىك قوي، عاجاپ اكتەر. الماتىعا نيكۋلين سيركى كەلەتىنىن بىلە سالىسىمەن، 3 بالامدى سيرككە الىپ كەلدىم. بالالارىما قويىلىم ۇنادى، ولار 2 ساعات بويى تاپجىلماي كوردى. جازعى دەمالىس كەزىندە اتاقتى سيركتىڭ قالامىزعا كەلگەنىنە قۋانىشتىمىن. سيركتى تاماشالاعان بالا اكتەرلەردىڭ ونەرى مەن ەڭبەگىن كوزبەن كورىپ، باعالايدى، قىزىعادى. ولاردىڭ تانىم-تۇسىنىكتەرى كەڭەيەدى دەپ ويلايمىن.
نيكۋلين سيركىندە كەزىندە اكتەر ويناعان كومەديالىق فيلمدەردىڭ ساۋند-ترەگى قوسىلعان كەزدە، اسىرەسە ەرەسەكتەر قاۋىمى بالالىق شاعىنا ورالعانداي ادەمى اسەردە بولدى. ونەردى سۇيەتىن كورەرمەن باردا اكتەردىڭ ەسىمى وشپەيدى، سيرك ونەرى ولمەيدى.
* قالالىقتار قاپەرىنە!
الماتىدا نيكۋلين سيركىنىڭ مەرەيتويلىق قويىلىمى 16 شىلدە مەن 21 تامىز ارالىعىندا وتەدى.
بيلەت باعاسى – 3000 تەڭگەدەن 6000 تەڭگەگە دەيىن.
4 جاسقا دەيىنگى بالالارعا تەگىن، ءبىراق بولەك ورىن بەرىلمەيدى.
سيرك شوۋىنىڭ ۇزاقتىعى – 2 ساعات.
سيركتە كەزدەسكەنشە!