الماتىدا تاعى ءبىر قارجى پيراميداسى انىقتالدى

ەكى مىڭنان استام جابىرلەنۋشىنىڭ اقشالاي قاراجاتىن زاڭسىز تارتقانى بەلگىلى بولدى. 

قازاقستان بويىنشا «ەلىماي-2019» تۇتىنۋ كووپەراتيۆى تۇرىندەگى قارجى پيراميداسى زاڭسىز قىزمەت اتقارعانى انىقتالدى. جابىرلەنۋشىلەر 1،5 ملرد تەڭگە كولەمىندە شىعىنعا باتتى، دەپ حابارلايدى Almaty-akshamy.kz ەgemen.kz سىلتەمە جاساپ. 

«الماتى وبلىسىنىڭ پروكۋرورلارى «ەلىماي-2019» تۇتىنۋ كووپەراتيۆىنىڭ باسشىلارىنا قاتىستى قارجى پيراميداسىن قۇرۋ فاكتىسى بويىنشا قوزعالعان قىلمىستىق ءىستى سوتقا جولدادى»، - دەلىنگەن وبلىستىق پروكۋراتۋرا حابارلاماسىندا.

تەرگەۋ بارىسىندا «ەلىماي-2019» وك باسشىلارى تۇرعىن ءۇي نەمەسە اۆتوكولىك ساتىپ الۋ ءۇشىن پايىزسىز قارىز بەرگەنى ءۇشىن قارجى پيراميداسىنىڭ قىزمەتىنە ەلىمىزدىڭ 12 وڭىرىنەن جالپى سوماسى 1،5 ملرد تەڭگەگە ەكى مىڭنان استام جابىرلەنۋشىنىڭ اقشالاي قاراجاتىن زاڭسىز تارتقانى انىقتالدى.

قىلمىستىق ءىس اياسىندا كۇدىكتىلەر مەن ولاردىڭ تۋىستارىنا تيەسىلى 15 جەر ۋچاسكەسى، 5 تۇرعىن ءۇي جانە 5 اۆتوماشينا تاركىلەندى، ولاردىڭ باعالاۋ قۇنى 145 ملن تەڭگەنى قۇرادى. سونداي-اق بانكتەگى 85 ملن تەڭگە سوماسىنداعى اقشا قاراجاتى دا تاركىلەندى.