الماتىدا «الماتى دارىنى» ورتالىعىنىڭ 2024 جىلعى جۇمىسىنىڭ قورىتىندىلارى جاريالاندى.
بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ورتالىق ديرەكتورى گۋلنۇر كاريمعاجى مالىمدەدى، حابارلايدى aqshamnews.kz.
«جىل بويى ورتالىق 200-دەن استام زياتكەرلىك وليمپيادا مەن بايقاۋ ۇيىمداستىرىپ، ولارعا 250 مىڭنان استام وقۋشى قاتىستى. 2024 جىلى الماتىنىڭ 894 وقۋشىسى 32 حالىقارالىق وليمپيادا مەن بايقاۋعا قاتىسىپ، ولاردىڭ 604ء-ى جەڭىمپاز جانە جۇلدەگەر اتاندى»، – دەدى سپيكەر.
ونىڭ ايتۋىنشا، حالىقارالىق وليمپيادالاردا قازاقستان قۇراماسى ساپىندا الماتىنىڭ 4 وقۋشىسى ونەر كورسەتىپ، بارلىعى كۇمىس مەدال جەڭىپ العان. ال رەسپۋبليكالىق جارىستاردا قالا كومانداسى 63 مەدال يەلەنىپ، «ۇزدىك وليمپيادالىق كوماندا – 2024» اتاعىنا يە بولدى.
الماتىلىق وقۋشىلار وليمپيادالاردا عانا ەمەس، روبوتوتەحنيكا سالاسىندا دا جوعارى جەتىستىكتەرگە جەتۋدە. 2024 جىلى قالا كومانداسى اقش-تىڭ داللاس قالاسىندا وتكەن چەمپيوناتتا ۇزدىك 10-دىققا ەندى. بۇدان بولەك، الماتىلىقتار جەنيەۆادا (2022)، سينگاپۋردا (2023) جانە افينادا (2024) ءۇش رەت الەم چەمپيونى اتانعان.
«ءبىز – 140-گيمنازيا مەكتەبىنىڭ Uly Dala كومانداسىمىز! ءبىزدىڭ روبوتوتەحنيكاداعى جولىمىز 2022 جىلى First Lego League تۋرنيرىنەن باستالدى، ال ۋاقىت وتە كەلە First Tech Challenge دەڭگەيىنە وتتىك. ءقازىر ءبىز جارىستارعا قىزۋ دايىندالىپ، بارلىق بوس ۋاقىتىمىزدى ستراتەگيالاردى جەتىلدىرۋگە، مەحانيزمدەر مەن باعدارلامالاۋدى دامىتۋعا ارناۋدامىز»، – دەدى كوماندا مۇشەسى ايحانىم شامشادين.
«Sana Team» كومانداسىنىڭ كاپيتانى سمايل دارىن دا ءوز جەتىستىكتەرىمەن ءبولىستى: «ءبىز روبوتوتەحنيكامەن ەكى جىلدان استام ۋاقىت اينالىسىپ كەلەمىز. وسى ۋاقىت ىشىندە اۆستراليا، كيپر، ءۇندىستان جانە قىرعىزستان سياقتى ەلدەردە بولدىق، قازاقستان اتىنان بەدەلدى ماراپاتتارعا يە بولدىق. ءقازىر ءبىز حيۋستونداعى الەمدىك جارىستارعا دايىندالىپ جاتىرمىز جانە جوعارى ناتيجە كورسەتەمىز دەپ ۇمىتتەنەمىز».
ايتا كەتەيىك، الماتىدا ورتالىق ازياداعى ەڭ ءىرى روبوتوتەحنيكا چەمپيوناتى – سۋ رەسۋرستارى ماسەلەسىنە ارنالعان Almaty Tech Cup وتەدى. جەڭىمپازدار قازاقستاندى حالىقارالىق ارەنادا تانىستىرۋ مۇمكىندىگىنە يە بولادى.