ول الماتى وبلىسىنداعى 3 اۋىلدىڭ جارىققا تولەگەن اقشاسىن جىمقىرعان.
قارجى مونيتورينگى اگەنتتىگىنىڭ مالىمەتى بويىنشا، 2019 جىلدان 2022 جىلعا دەيىن، قۇقىعى بولماسا دا اۋىل تۇرعىندارىنان تۇتىنىلعان ەلەكتر ەنەرگياسى ءۇشىن تولەم قابىلداعان، دەپ حابارلايدى Almaty-akshamy.kz
ياعني قاراوي، قۋات جانە وتەگەن باتىر اۋىلىنىڭ تۇرعىندارىنا جالعان تولەم تۇبىرتەكتەرىن بەرىپ، العان اقشانى ءوز قاجەتىنە جاراتىپ وتىرعان.
"ءوزىنىڭ قىلمىستىق ارەكەتتەرىن جاسىرۋ ءۇشىن ارىپتەستەرىنىڭ لوگيندەرى مەن قۇپيا سوزدەرىن پايدالانىپ، دەرەكقورعا جالعان اقپارات ەنگىزگەن"، - دەلىنگەن حابارلامادا.
سوتقا دەيىنگى تەرگەپ-تەكسەرۋ بارىسىندا الماتى وبلىسى بويىنشا قما دەپارتامەنتى اتالعان اۋىلداردىڭ 150-دەن استام تۇرعىنىن ەلەكتر جەلىسىنەن اجىراتۋعا جول بەرمەۋ، سونداي-اق 16 ميلليون تەڭگەگە جۋىق زالالدىڭ ورنىن تولتىرۋ شارالارىن قابىلدادى.
«الماتىەنەرگوسبىت» ج ش س جەكە تۇلعالارمەن جۇمىس جونىندەگى ينجەنەرى الاياقتىق جاساعانى ءۇشىن كىنالى دەپ تانىلىپ، بەس جىلعا باس بوستاندىعىنان ايىرىلدى.