الماتىدا گەرولد بەلگەردى ەسكە الۋ كەشى ءوتتى

قازاق، ورىس جانە نەمىس تىلدەرىندە ولەڭ وقىلدى.

«سەكسەن سەگىزىنشى كۇز». الماتىدا وسىنداي اتاۋمەن بەلگىلى قازاقستاندىق پروزاشى، پۋبليسيست، اۋدارماشى گەرولد بەلگەردىڭ ءومىرى مەن شىعارماشىلىعىنا ارنالعان ەسكە الۋ كەشى ءوتتى، دەپ حابارلايدى Almaty-akshamy.kz Almaty.tv سىلتەمە جاساپ.

ءىس-شارانى ۇيىمداستىرۋعا رەسپۋبليكالىق دوستىق ءۇيى جانە قالاداعى نەمىس ەتنو-مادەني قوعامى مۇرىندىق بولدى. ەسكە الۋ كەشىندە جازۋشىنىڭ ەڭبەكتەرىنەن كورمە قويىلىپ، قازاق، ورىس جانە نەمىس تىلدەرىندە ولەڭ وقىلدى.

«بۇل كەشتى ۇيىمداستىرۋدىڭ باستى ماقساتى – ول كىسىنىڭ قازاق ەلىنە، قازاق ادەبيەتىنە، قازاق مادەنيەتىنە سىڭىرگەن ەڭبەگىن ناسيحاتتاۋ. ونى ءبىز بەلگىلى ادەبيەتشى، كوركەم ءسوزدىڭ شەبەرى، اۋدارماشى، ءتىلدىڭ جاناشىرى رەتىندە بىلەمىز»، – دەدى رەسپۋبليكالىق دوستىق ءۇيىنىڭ قىزمەتىن قامتاماسىز ەتۋ باسقارماسىنىڭ باسشىسى نۇرساۋلە التەكوۆا.

گەرولد بەلگەردى ەسكە الۋعا جاقىندارى، دوستارى، شاكىرتتەرى، قحا مۇشەلەرى، زيالى قاۋىم وكىلدەرى مەن قوعام قايراتكەرلەرى قاتىستى. كەش سوڭىندا دوڭگەلەك ۇستەل ۇيىمداستىرىلىپ، گەرولد بەلگەردىڭ ومىرىنەن سىر شەرتەتىن بەينەروليك كورسەتىلدى.

«گەرولد بەلگەر – وتە تاماشا ادام ەدى. ول قازاق ەلىن، قازاق ءتىلىن، مادەنيەتى مەن ءداستۇرىن بار جان-تانىمەن جاقسى كوردى. سانالى عۇمىرىندا ءتورت رومان، ەكى پوۆەست جازىپ قالدىردى. جانىنا جاقىن ادامداردى ەرەكشە قۇرمەتتەيتىن. جازۋشىسىن توبەسىنە كوتەرىپ، ءار جىل سايىن جادىنان شىعارمايتىن بارشا قازاقستاندىقتارعا ايتار العىسىم شەكسىز»، – دەدى گ. بەلگەردىڭ ايەلى رايسا حيسماتۋللينا.