الماتىداعى توزىعى جەتكەن ينجەنەرلىك جەلىلەر جاڭارتىلادى

قالا تۇرعىندارى ساپالى سۋمەن قامتاماسىز ەتىلەدى.

قالا اكىمدىگى حالىق الدىنداعى ءوز مىندەتتەمەلەرىن ورىنداۋدى جانە ينجەنەرلىك جەلىلەردى بارىنشا توزۋ دەڭگەيىمەن جاڭعىرتۋدى، سونداي-اق 100% ورتالىقتاندىرىلعان جانە ساپالى سۋمەن قامتاماسىز ەتۋدى قالايدى. بۇل تۋرالى قالالىق ءماسليحاتتىڭ XXV سەسسياسىنىڭ وتىرىسىندا قالا اكىمىنىڭ ورىنباسارى مۇحيت ازىربايەۆ ايتتى، دەپ حابارلايدى Almaty-akshamy.kz. 

«توزۋدى تومەندەتۋ ءۇشىن جىل سايىن 13،2 ملرد. تەڭگە سوماسىنا شامامەن 104 كم سۋمەن جابدىقتاۋ جەلىلەرىن (ديامەترى 100-دەن 1500 مم-گە دەيىن)، 15،5 ملرد. تەڭگە سوماسىنا 57 كم سۋ بۇرۋ جەلىلەرىن (ديامەترى 100-دەن 1500 مم-گە دەيىن)، 15 ملرد. تەڭگە سوماسىنا 30 كم جىلۋ جەلىلەرىن، 120 كم ەلەكترمەن جابدىقتاۋ جەلىلەرىن، 8،7 ملرد. تەڭگە، 4 ملرد. تەڭگە سوماسىنا 40 كم گاز جەلىلەرى رەكونسترۋكسيالاۋ قاجەت»، - دەدى مۇحيت ازىربايەۆ.

ونىڭ ايتۋىنشا، بۇدان باسقا، جاڭا جوبالاردى ىسكە اسىرۋ ماقساتىندا شامامەن 541 ملرد. تەڭگە تالاپ ەتىلەدى. 

«ونىڭ ىشىندە بيۋدجەتتىك 316،1 ملرد تەڭگە جاڭا سۋ كوزدەرىن سالۋ ءۇشىن، اقىلدى تەحنولوگيالاردى ەنگىزۋ ءۇشىن، كارىز كوللەكتورلارىن رەكونسترۋكسيالاۋ جانە سالۋ ءۇشىن، كسس جانە كتق رەكونسترۋكسيالاۋ ءۇشىن، جارىقتاندىرۋ دەڭگەيىن جاقسارتۋ جانە "2030 جىلعا دەيىن ەلەكتر جەلىلەرىن دامىتۋ سحەمالارى" جوباسىن ىسكە اسىرۋ ءۇشىن قاجەت بولادى. ونىڭ اياسىندا اۋە جەلىلەرىن كابەلدىك جەلىلەرگە اۋىستىرۋ، جاڭا ەلەكتر جەلىلەرىن سالۋ قاراستىرىلعان»، - دەدى قالا اكىمىنىڭ ورىنباسارى.

جالپى، 2030 جىلعا دەيىن شامامەن 962،3 ملرد تەڭگە سوماسىندا ينۆەستيسيالار قاجەت بولادى، ونىڭ ىشىندە بيۋدجەتتەن 625،6 ملرد تەڭگە ينۆەستيسيالار ەسەبىنەن.