بۇل تۋرالى الماتى قالاسى اكىمى ورىنباسارى ا. قىرىقبايەۆ مالىمدەدى، دەپ حابارلايدى اlmaty-akshamy.kz
الماتى ورتالىق ازيا وڭىرىندە سپورتتى دامىتۋ بويىنشا تانىمال كوشباسشى بولىپ تابىلادى. قالادا ازيا ويىندارى، دۇنيەجۇزىلىك ۋنيۆەرسيادا، الەم چەمپيوناتتارى، الەم كۋبوگىنىڭ كەزەڭدەرى جانە ت.ب. سياقتى ءىرى سپورتتىق ءىس-شارالاردى وتكىزۋ تاجىريبەسى بار.
قالادا ءارتۇرلى مەنشىك نىسانىنداعى 3 611 سپورت وبەكتىلەرى جۇمىس ىستەيدى. سپورتتىڭ 78 ءتۇرى ماقساتتى تۇردە دامۋدا. دەنە شىنىقتىرۋمەن جانە سپورتپەن تۇراقتى تۇردە (اپتاسىنا كەمىندە 1 رەت) اينالىساتىن قالا تۇرعىندارىنىڭ سانى 34% - دى نەمەسە 660 مىڭ ادامدى قۇرايدى.
قالا ءداستۇرلى تۇردە ەلىمىزدىڭ جالپى كوماندالىق بىرىنشىلىگىندە كوش باستاپ كەلەدى، قالا سپورتشىلارى قازاقستاننىڭ وليمپيادالىق قۇراماسى مۇشەلەرىنىڭ 30% - ىن قۇرايدى.
سونىمەن قاتار، سالادا ءبىرقاتار پروبلەمالىق ماسەلەلەر بار.
ءبىرىنشى. وبەكتىلەردىڭ تاپشىلىعى. تابيعي ءوسىم مەن ىشكى كوشى-قون پروسەستەرىنىڭ ەسەبىنەن قالا حالقى جىل سايىن ارتىپ كەلەدى. بۇگىنگى تاڭدا قالادا جالپى اۋدانى 81 500 م2 بولاتىن جابىق سپورت نىساندارى بولسا، 65 000 م2 تاپشىلىق ساقتالۋدا؛
ەكىنشى. مادەنيەت وبەكتىلەرىندەگىدەي سپورتتىق ينفراقۇرىلىمدى بولۋدە تەپە-تەڭسىزدىك بار. مىسالى، الاتاۋ، جەتىسۋ، ناۋرىزباي جانە تۇركسىب اۋداندارىندا قالا حالقىنىڭ 45% - ى تۇرادى. بۇل رەتتە ولاردا فۋتبول الاڭدارىنىڭ تەك 30%-ى، باسسەيندەردىڭ 20% - ى، فيتنەس-زالداردىڭ 22%-ى عانا بار.
ءۇشىنشى. جاسالعان جاعدايلارعا، ەلدەگى ۇزدىك ينفراقۇرىلىمعا، بىلىكتى جاتتىقتىرۋشىلاردىڭ، نۇسقاۋشىلاردىڭ جەتكىلىكتىلىگىنە قاراماستان، ستاتيستيكا دەرەكتەرى بويىنشا دەنە شىنىقتىرۋمەن تۇراقتى اينالىسپايتىن الماتىلىقتاردىڭ ۇلەسى 70% - عا دەيىن قۇرايدى.
وسى پروبلەمالاردى شەشۋ ماقساتىندا مادريد، بوستون، ليسسابون، ۆەنا، سيۋريح، ۆالەنسيا سياقتى قالالاردىڭ حالىقارالىق تاجىريبەسى زەرتتەلدى، ولار سپورتتىق ينفراقۇرىلىممەن قامتاماسىز ەتۋ بويىنشا، قالا تۇرعىندارىنىڭ دەنە شىنىقتىرۋ مەن سپورتقا دەگەن قىزىعۋشىلىق دەڭگەيى بويىنشا دا، ياعني حالىقتى سالاۋاتتى ءومىر سالتىنا سانالى تۇردە تارتۋ بويىنشا دا كوشباسشى بولىپ تابىلادى.
تالداۋ كورسەتكەندەي، سپورتتى دامىتۋ حالىقتى ساۋىقتىرۋ مەن الەۋمەتتەندىرۋدىڭ عانا ەمەس، جالپى ەكونوميكالىق دامۋدىڭ قوسىمشا فاكتورى بولىپ تابىلادى.