ۇستالعانداردى جەكە قابىلداۋ كەزىندە مەكەمەدەگى ۇستاۋ جاعدايلارىنا، ونىڭ ىشىندە ازاپتاۋلارعا قاتىستى شاعىمدار بولعان جوق.
الماتىداعى تەرگەۋ يزولياتورىنا دەپۋتاتتار كەلدى، دەپ حابارلايدى Polisia.kz.
الماتى قالاسى بويىنشا قىلمىستىق-اتقارۋ جۇيەسىنە قاراستى تەرگەۋ يزولياتورىنا قازاقستان رەسپۋبليكاسى پارلامەنت ءماجىلىسىنىڭ جانە الماتى قالاسى ءماسليحاتىنىڭ دەپۋتاتتارى، ادۆوكاتتار مەن ارداگەرلەر كەلىپ، ۇستالعانداردىڭ جاعدايىمەن تانىستى.
پارلامەنت ءماجىلىسىنىڭ دەپۋتاتتارى ا. ليننيك، ا. قوجاحمەتوۆ، ب. دۇيسەنبينوۆ، گ. بيجانوۆا، ۆ. نابييەۆ، ن. راززاق جانە الماتى قالاسى ءماسليحاتىنىڭ دەپۋتاتى ا. ابىلكاسيموۆا، ادۆوكاتتار ج.ساپارحانوۆا مەن ن.جازىلبەكوۆ تەرگەۋ يزولياتورىنىڭ رەجيمدىك كورپۋستارىندا بولىپ، كۇدىكتىلەردىڭ جاي-كۇيىن كورىپ شىقتى.
تەرگەۋ يزولياتورىنا كەلگەن دەپۋتاتتار مەن ادۆوكاتتارعا الماتى قالاسى پروكۋرورىنىڭ ورىنباسارى ن. اۋعانبايەۆ پەن الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ باستىعى د. قاناتبەكوۆ لا-155/18 مەكەمەنىڭ (تەرگەۋ يزولياتورى) قىزمەتىن ۇيىمداستىرۋ جانە قاڭتار وقيعاسى كەزىندە قامالعانداردى تەرگەپ-تەكسەرۋ ءتارتىبى جايلى اقپارات بەردى.
ءماجىلىس دەپۋتاتتارى تەرگەۋ يزولياتورىنداعى تەكسەرۋدەن كەيىن قاڭتار وقيعاسىنا قاتىستى ۇستالعان 11 كۇدىكتىنى جەكە قابىلداپ، وتىنىشتەرىن تىڭدادى. ۇستالعانداردى جەكە قابىلداۋ كەزىندە مەكەمەدەگى ۇستاۋ جاعدايلارىنا، ونىڭ ىشىندە ازاپتاۋلارعا قاتىستى شاعىمدار بولعان جوق.