2026 جىلى الماتى قالاسى مۋزەيلەر بىرلەستىگىنە قاراستى "رايىمبەك باتىر" زاماناۋي مۋزەيلەندىرىلگەن مەموريالدىق كەشەنى اشىلادى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى مادەنيەت باسقارماسىنىڭ باسشىسى دانيار الييەۆ مالىمدەدى.
كەشەن تاريحي تۇلعانىڭ ءومىرى مەن ەرلىگىن زاماناۋي فورماتتا كورسەتۋگە ارنالعان مۋزەيلەندىرىلگەن كەڭىستىك رەتىندە جوبالانىپ جاتىر.
كەشەننىڭ نەگىزگى قۇرامداس بولىكتەرى:
- رايىمبەك باتىرعا ارنالعان ەسكەرتكىش: تاريحي تۇلعانىڭ بەينەسىن زاماناۋي ساۋلەت ستيلىندە كورسەتۋ، ونىڭ ەرلىكتەرىن جانە باتىرلىق ءداستۇرىن دارىپتەۋ.
- ەكسپوزيسيالىق زالدار: باتىردىڭ ءومىر جولى، جاۋىنگەرلىك ەرلىكتەرى جانە تاريحي ءداۋىرىن سيپاتتايتىن ينتەراكتيۆتى كورمەلەر. قوناقتار مۋلتيمەديالىق بەينەلەر، 3D-مودەلدەر جانە تاريحي رەكونسترۋكسيا ارقىلى باتىردىڭ ومىرىنە كوز جەتكىزە الادى.
- ءبىلىم بەرۋ جانە مادەني كەڭىستىكتەر: ارنايى زالدار، ماستەر-كلاسستار، لەكسيالار مەن سەمينارلار ءۇشىن ينتەراكتيۆتى ورىندار. مۇندا جاس ۇرپاققا پاتريوتتىق تاربيە بەرۋگە، باتىرلىق داستۇرلەردى ناسيحاتتاۋعا ارنالعان ارنايى باعدارلامالار قاراستىرىلعان.
- ۆيرتۋالدى جانە مۋلتيمەديالىق جوبالار: كەلۋشىلەر VR-تۋرلار ارقىلى تاريحي شايقاستارعا قاتىسا الادى، ۆيرتۋالدى كورمەلەر جانە ينتەراكتيۆتى پرەزەنتاسيالار ارقىلى قازاقستاننىڭ مادەني مۇراسىن زەرتتەي الادى.
مەموريالدىق كەشەننىڭ نەگىزگى ماقساتى – ءوڭىر تاريحىن، قازاق حالقىنىڭ مادەني جانە رۋحاني مۇراسىن حالىققا قولجەتىمدى، قىزىقتى جانە ءبىلىمدى فورماتتا ۇسىنۋ. كەشەن تۋريستەر مەن قالا تۇرعىندارىنا رۋحاني تاجىريبە بەرىپ، الماتىنى ەلىمىزدىڭ مادەني جانە تاريحي ءتۋريزمىنىڭ ورتالىعىنا اينالدىرۋعا اتسالىسادى.
سونىمەن قاتار، الماتى قالاسىندا "Observatorium" مۋزەيى اشىلادى. اۋماعى 130 شارشى مەتردى قۇرايتىن بۇل مۋزەي عىلىمدى، استرونوميانى جانە زاماناۋي تەحنولوگيالاردى ناسيحاتتاۋعا باعىتتالعان. مۇندا كەلۋشىلەر:
- عارىش پەن استرونوميالىق قۇبىلىستاردى زەرتتەۋگە ارنالعان ينتەراكتيۆتى ەكسپوزيسيالار؛
- ءبىلىم بەرۋ زەرتحانالارى جانە عىلىمي تاجىريبەلەردى قولمەن ورىنداۋ مۇمكىندىگى؛
- عىلىمي كورسەتىلىمدەر، مۋلتيمەديالىق ينستاللياسيالار جانە ۆيرتۋالدى سيمۋلياسيالار ارقىلى ءبىلىم الۋ؛
- زاماناۋي تەحنولوگيالاردى، روبوتوتەحنيكا جانە فيزيكا زاڭدىلىقتارىن قولجەتىمدى ءارى قىزىقتى فورماتتا مەڭگەرۋ مۇمكىندىگىنە يە بولادى.
بۇل ەكى جاڭا مادەني جانە عىلىمي ورىن الماتى قالاسىن تەك تۋريستىك ەمەس، سونىمەن قاتار ءبىلىم مەن عىلىم ورتالىعى رەتىندە تانىمال ەتۋگە زور مۇمكىندىك بەرەدى. مۋزەيدىڭ قورىتىندى بولىگىن تەلەسكوپ ارقىلى جۇلدىزدى اسپان مەن پلانەتالاردى تىكەلەي باقىلاۋعا بولاتىن ءتىرى باقىلاۋ كەڭىستىگى قۇرايدى. بۇل ايماق ادام مەن شەكسىز عالام اراسىنداعى فيلوسوفيالىق بايلانىستى سەزىنۋگە مۇمكىندىك بەرەدى.
"Observatorium" مۋزەيىندە جاساندى ينتەللەكت تەحنولوگيالارىن ەنگىزۋ، سونىڭ ىشىندە "عالام بويىنشا VR-ساياحات" ينتەراكتيۆتى جوباسىن ىسكە قوسۋ جانە روبوت-ەكسكۋرسوۆودتى ەنگىزۋ جوسپارلانۋدا.
دانيار الييەۆ، الماتى قالاسى مادەنيەت باسقارماسىنىڭ باسشىسى:
"رايىمبەك باتىر كەسەنەسى مەن Observatorium مۋزەيى – بۇل تەك تۋريستىك نىساندار عانا ەمەس، ولار – ءبىزدىڭ تاريحىمىزدى، مادەنيەتىمىزدى جانە عىلىمداعى جەتىستىكتەرىمىزدى كەلەشەك ۇرپاققا جەتكىزۋدىڭ جاڭا ءتاسىلى. كەلۋشىلەر وسى جەردەن رۋحاني جانە ينتەللەكتۋالدى تاجىريبە الادى".