2026 جىلى الماتى قالاسى مادەنيەت پەن ونەردىڭ الدىڭعى قاتارىنداعى حالىقارالىق جانە رەسپۋبليكالىق دەڭگەيدەگى ءىرى ءىس-شارالارعا كۋا بولادى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى مادەنيەت باسقارماسىنىڭ باسشىسى دانيار الييەۆ حابارلادى.
"الماتى قالاسى ەلىمىزدىڭ مادەني استاناسى رەتىندە مادەني-بۇقارالىق ءىس-شارالاردى جوعارى دەڭگەيدە ۇيىمداستىرۋعا ەرەكشە ءمان بەرەدى. ءبىز قالا تۇرعىندارى مەن قوناقتارىنا ونەردىڭ بارلىق باعىتتارىن قامتيتىن، زاماناۋي ءارى مازمۇندى مادەني باعدارلامالار ۇسىنامىز. 2026 جىلى الماتىلىقتاردى جارقىن ءارى ەستە قالارلىق مادەني وقيعالار كۇتىپ تۇر"، – دەدى باسقارما باسشىسى.
تەاترلىق قويىلىمدار:
"الاتاۋ" ءداستۇرلى ونەر تەاترى "تازا قازاقستان" ەكولوگيالىق اكسياسىن قولداۋ ماقساتىندا "تازا جۇرەك" سپەكتاكلىنىڭ پرەمەراسىن كورەرمەن نازارىنا ۇسىنباق. ال مەملەكەتتىك اكادەميالىق قۋىرشاق تەاترى اتالعان باستاما اياسىندا "تازالىق ساقشىلارى" قويىلىمىن ساحنالاۋدى جوسپارلاپ وتىر.
سونىمەن قاتار، "الاتاۋ" ءداستۇرلى ونەر تەاترى ءوزىنىڭ 10 جىلدىق مەرەيتويىنا وراي ءبىرقاتار جاڭا قويىلىم ازىرلەۋدە. اتاپ ايتقاندا، باقىت بەدەلحاننىڭ شىعارماشىلىعىنا ارنالعان "باقىتپەن ۋاقىت" ميۋزيكلى، جامبىل جابايەۆتىڭ 180 جىلدىعىنا ارنالعان مۋزىكالىق-تەاترلاندىرىلعان "جىر الىبى – جامبىل" قويىلىمى، سونداي-اق مۇحتار ءماعاۋيننىڭ شىعارماسى نەگىزىندە قويىلاتىن "جارىعىم" مۋزىكالىق دراماسى كورەرمەنگە جول تارتپاق.
تەاتر 2026 جىلى "Mamluk. سۇلتان بەيبارىس" قويىلىمىمەن حالىقارالىق جانە رەسپۋبليكالىق گاسترولدىك ساپار ۇيىمداستىرىپ، ەگيپەت ەلىندە، سونداي-اق اتىراۋ مەن استانا قالالارىندا ونەر كورسەتۋدى جوسپارلاپ وتىر.
مەملەكەتتىك اكادەميالىق قۋىرشاق تەاترى 2026 جىلى "التى جاسار الپامىس"، "جاقسىلىق پەن جاماندىق"، "وسكار جانە راۋشان حانىم"، "الماتى – ەڭ العاشقى ماحابباتىم"، "قار حانشايىمى" اتتى جاڭا سپەكتاكلدەرىن كورەرمەن نازارىنا ۇسىنباق.
ودان بولەك، "جاڭا عاسىر" تەاترى دا رەپەرتۋارىن جاڭا پرەمەرالارمەن تولىقتىرادى. اتاپ ايتقاندا، "تەڭىزدەگى تورتەۋ" تراگيفارسى، بالالارعا ارنالعان "الاددين" ەرتەگىسى جانە "ءجاميلا" مۋزىكالىق دراماسى ساحنالانادى.
كونسەرتتىك باعدارلامالار:
كسرو حالىق ءارتىسى، قازاق مۋزىكا ونەرىنىڭ كورنەكتى وكىلى ەرمەك سەركەبايەۆتىڭ 100 جىلدىعىنا وراي الماتى اۋەندەرى مەكەمەسىنىڭ بارلىق شىعارماشىلىق ۇجىمدارىنىڭ قاتىسۋىمەن مەرەيتويلىق كونسەرت وتكىزۋ جوسپارلانۋدا. سونىمەن قاتار، رەسپۋبليكا سارايىنىڭ 55 جىلدىق مەرەيتويىنا بايلانىستى جەكە ورىنداۋشىلاردىڭ گاسترولدىك ساپارى ۇيىمداستىرىلىپ، جوبا قازاقستان رەسپۋبليكاسىنىڭ ءبىرقاتار وڭىرلەرىن قامتىماق.
سيرك باعدارلامالارى:
اقپان ايىندا قازاق مەملەكەتتىك سيركىندە يتاليالىق دۋەت فلاۆيو مەن برۋنو ءتونيدىڭ "BELISSIMO" شوۋ باعدارلاماسى العاش رەت وتەدى. باعدارلامادا برۋنو ءتونيدىڭ اتى اڭىزعا اينالعان ۇيرەتىلگەن قىزعىلت جانە اق جولبارىستارى، اكروباتتار، اۋەدەگى يمپاساتو جانە ارقانمەن جۇرەتىن ونەرپازدار، شەبەر جونگلەرلەر، لاتىن امەريكاسىنان كەلگەن كوڭىلدى سايقىمازاقتار بولادى.
ال ءناۋرىز-ساۋىر ايلارىندا ناۋرىزباي جانە جەتىسۋ اۋداندارىندا شاپيتو جىلجىمالى سيركى ۇيىمداستىرىلادى.
حالىقارالىق فەستيۆالدەر:
2026 جىلى الماتىدا "Almaty Circus Festival"، "Almaty Puppet Festival"، "ۇلى دالا – كوشپەندىلەر الەمى" ەتنوفەستيۆالى، "اشىق اسپان استىنداعى سيرك"، "عاسىرلار سازى"، "الماتى سۋرەتشىلەر كوزىمەن"، Almaty Film Festival، سونداي-اق "ءانشى بالاپان" جوباسىنىڭ زاماناۋي فورماتتاعى نۇسقاسى وتكىزىلەدى.
2026 جىلى ۇيىمداستىرىلاتىن IV حالىقارالىق "Almaty Puppet Festival" قۋىرشاق تەاترلارى فەستيۆالى الەمنىڭ ۇزدىك تەاتر ۇجىمدارىنىڭ باسىن قوسادى. فەستيۆال وتاندىق جانە شەتەلدىك ونەر ۇجىمدارى اراسىنداعى شىعارماشىلىق بايلانىستى نىعايتىپ، كاسىبي تاجىريبە الماسۋعا، سونداي-اق بالالار مەن جاسوسپىرىمدەرگە ارنالعان تەاتر ونەرىن كەڭىنەن ناسيحاتتاۋعا باعىتتالادى.
قورىتىندىلاي كەلە، 2026 جىلى الماتى قالاسى مۋزىكا، تەاتر، بي، كوركەمونەر جانە ادەبيەت سالاسىنداعى ءىرى حالىقارالىق فەستيۆالدەر مەن بايقاۋلار وتەتىن مادەني ورتالىق رەتىندە ءوز مارتەبەسىن ايقىنداي تۇسەدى. جوسپارلانعان ءىس-شارالار قالانىڭ مادەني الەۋەتىن ارتتىرىپ قانا قويماي، تۇرعىندار مەن قوناقتارعا جوعارى دەڭگەيدەگى رۋحاني دەمالىس پەن ۇمىتىلماس اسەر سىيلايدى.