الماتى قالاسىنىڭ مەملەكەتتىك ءارحيۆى ەلدىڭ تاريحي-مادەني مۇراسىن ساقتاۋداعى نەگىزگى قورلاردىڭ ءبىرى بولىپ تابىلادى. بۇگىنگى تاڭدا ارحيۆتە 2 139 قور ساقتاۋلى، ونىڭ ىشىندە 145ء-ى جەكە تەكتىك قورلار. اتالعان قورلاردىڭ قۇرامىندا 1860–2025 جىلدار ارالىعىن قامتيتىن 1 342 975 ساقتاۋ بىرلىگى بار. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگ بارىسىندا الماتى قالاسى مادەنيەت باسقارماسىنىڭ باسشىسى دانيار الييەۆ مالىمدەدى.
2025 جىلى مەملەكەتتىك ساقتاۋعا ءارتۇرلى تاسىمالداعىشتارداعى 22 514 ساقتاۋ بىرلىگى قابىلداندى. بۇل ارحيۆ قورلارىنىڭ جۇيەلى تۇردە تولىقتىرىلىپ، قۇجاتتىق ءماسسيۆتىڭ تۇراقتى ءوسىپ وتىرعانىن كورسەتەدى.
"سيفرلىق قازاقستان" مەملەكەتتىك باعدارلاماسىن ىسكە اسىرۋ اياسىندا الماتى قالاسىنىڭ مەملەكەتتىك ارحيۆىندە ارحيۆتىك قۇجاتتاردى سيفرلاندىرۋ جۇمىستارى تۇراقتى تۇردە جۇرگىزىلۋدە.
"2023–2025 جىلدار ارالىعىندا ارحيۆتىك ماتەريالداردى سيفرلىق فورماتقا كوشىرۋ كورسەتكىشتەرىنىڭ ءوسۋى تەحنيكالىق بازانىڭ كەزەڭ-كەزەڭىمەن جاڭارتىلۋى جانە زاماناۋي كەڭسە تەحنيكاسىنىڭ ساتىپ الىنۋىمەن تىكەلەي بايلانىستى. اتاپ ايتقاندا، 2023 جىلى ارحيۆتىك قۇجاتتاردى سيفرلاندىرۋ كولەمى 2022 جىلمەن سالىستىرعاندا 3 پايىزعا ارتتى"، – دەپ اتاپ ءوتتى باسقارما باسشىسى دانيار الييەۆ.
2025 جىل ارحيۆ ءۇشىن ەرەكشە ماڭىزعا يە بولدى. وسى جىلى ارحيۆكە پلانەتارلىق جانە اۆتوماتتاندىرىلعان كىتاپ سكانەرلەرى ساتىپ الىندى. بۇل قۇجاتتارعا زاقىم كەلتىرمەي، ۇقىپتى ءارى ءقاۋىپسىز تۇردە سيفرلاندىرۋعا مۇمكىندىك بەردى. اتالعان جابدىقتار ستاندارتتى ەمەس ماتەريالداردى (سىزبالار، كارتالار، سحەمالار)، سونداي-اق فيزيكالىق تۇرعىدان السىرەگەن قۇجاتتاردى (كالكا، كرافت-قاعاز، ۆينتاجدى تاسىمالداعىشتار) سيفرلاندىرۋدا كەڭىنەن قولدانىلۋدا.
2026 جىلعى 1 قاڭتارداعى جاعداي بويىنشا ارحيۆتە 146 529 ءىس سيفرلاندىرىلىپ، ولاردىڭ جالپى كولەمى 20 012 075 پاراقتى قۇرادى.
2025 جىلى "ارحيۆتىك انىقتامالار، ارحيۆتىك قۇجاتتاردىڭ كوشىرمەلەرى مەن ارحيۆتىك ۇزىندىلەردى بەرۋ" مەملەكەتتىك قىزمەتى اياسىندا 35 946 قىزمەت كورسەتىلدى.
الماتى قالاسىنىڭ مەملەكەتتىك ءارحيۆى ۇرپاقتار ساباقتاستىعىن ايقىندايتىن قۇجاتتىق جادىنى ساقتاۋمەن قاتار، زاماناۋي سيفرلىق شەشىمدەردى بەلسەندى تۇردە ەنگىزۋدە. بۇل تاريحي مۇرانى ازاماتتار، زەرتتەۋشىلەر جانە بولاشاق ۇرپاق ءۇشىن بارىنشا قولجەتىمدى ەتۋگە مۇمكىندىك بەرەدى. ءارحيۆتىڭ سيفرلىق ترانسفورماسياسى وتكەن مەن بۇگىندى جالعايتىن ماڭىزدى كوپىرگە اينالىپ، تاريحتى ءتىرى ءارى اشىق رەسۋرس رەتىندە ۇسىنۋدا.