انۋاربەك بايجانبايەۆتىڭ تۋعانىنا 100 جىل تولدى
بيىل "قازاقتىڭ ليەۆيتانى» اتانعان اتاقتى ديكتور، قازاقستاننىڭ حالىق ءارتيسى انۋاربەك بايجانبايەۆتىڭ تۋعانىنا 100 جىل تولدى. اتاۋلى مەرەيتويعا وراي، الماتىداعى راديوستۋدياعا داۋىلپاز ديكتوردىڭ ەسىمى بەرىلدى، دەپ حابارلايدى Almaty-akshamy.kz.
- الماتىداعى ساپارىمىز اياسىندا قازاق راديوسىنىڭ ۇجىمىنا بارىپ، داۋىلپاز ديكتور انۋاربەك بايجانبايەۆ اتىنداعى ستۋديانىڭ اشىلۋ سالتاناتىنا قاتىستىق. ۇلاعاتتى ءىس-شارا قايتالانباس داۋىس يەسىنىڭ، راديو ارداگەرىنىڭ 100 جىلدىعىنا وراي ۇيىمداستىرىلىپ وتىر. قازاق ءسوز ونەرىنىڭ قادىر-قاسيەتى بايجانبايەۆتىڭ قوڭىر ءۇنى ارقىلى ايشىقتالدى. قازاق راديوسى دەگەندە بىردەن ەلدىڭ ەسىنە انۋاربەك بايجانبايەۆتىڭ تۇسەتىنى سوندىقتان. ايگىلى ديكتوردىڭ ەل رۋحانياتىنا قوسقان ەڭبەگىن دارىپتەۋ بارشامىزدىڭ ورتاق پارىزىمىز، - دەپ جازدى اقپارات جانە قوعامدىق دامۋ ءمينيسترى دارحان ءقىدىرالى.
ءىس-شارادا انۋاربەك بايجانبايەۆتىڭ ۇرپاقتارى مەن كوزىن كورگەن ارىپتەستەرى، راديو ارداگەرلەرىنىڭ دە جىلى لەبىزدەرى مەن ەستەلىكتەرى ايتىلدى.
ايتا كەتەيىك، بىلتىر استاناداعى ستۋدياعا ءابدىرالى بولەبايدىڭ ەسىمى بەرىلگەن.