فورۋمدا بالالار ونكولوگياسى مەن گەماتولوگياسى سالاسىنداعى وزەكتى ماسەلەلەر تالقىلاندى
2023 جىلعى 11-12 مامىردا ق ر بالالار ونكوگەماتولوگيا قىزمەتiءنىڭ 30 جىلدىعىنا ارنالعان «بالالار ونكوگەماتولوگيالىق قىزمەتىنىڭ دامۋىنا 30 جىل: جەتىستىكتەرى مەن بولاشاعى» اتتى حالىقارالىق عىلىمي-تاجىريبەلىك كونفەرەنسيا ءوتتى، دەپ حابارلايدى Almaty-akshamy.kz.
ونلاين جانە وفلاين تۇرىندە وتكەن كونفەرەنسيا جۇمىسىنا گەرمانيا، تۇركيا، رەسەي، بەلارۋسيا، وزبەكستان، لاتۆيا، ۋكراينا، تاجىكستان جانە ت.ب. شەت ەلدىڭ جەتەكشى ماماندارى، استانا جانە الماتى قالالارىنداعى ەكى رەسپۋبليكالىق عىلىمي ورتالىقتىڭ بالالار ونكولوگياسى مەن گەماتولوگيا سالاسىنىڭ ماماندارى، وبلىستىق ونكولوگتار مەن گەماتولوگتار، ۇكىمەتتىك ەمەس ۇيىمدار مەن اتا-انالار قاۋىمداستىعىنىڭ وكىلدەرى، بارلىعى 500-دەن استام مامان قاتىستى.
كونفەرەنسيانىڭ باستى ماقساتى – بالالار جاسىنداعى ونكولوگيالىق جانە گەماتولوگيالىق اۋرۋلاردى دياگنوستيكالاۋ مەن ەمدەۋدىڭ بۇگىنگى وزەكتى ماسەلەلەرىن تالقىلاۋ، حالىقارالىق جانە ءوڭىرارالىق ىنتىماقتاستىقتى دامىتۋ، بالالارداعى ونكولوگيالىق اۋرۋلاردى ەرتە دياگنوستيكالاۋ جانە ەمدەۋ قاجەتتىلىگى تۋرالى ەسكەرتۋ ماقساتىندا كۇش-جىگەردى بىرىكتىرۋ.
حالىقارالىق كونفەرەنسيا قازاقستان رەسپۋبليكاسىنىڭ دەنساۋلىق ساقتاۋ ۆيسە-مينيسترى ۆياچەسلاۆ دۋدنيكتىڭ، س.ج.اسفەندياروۆ اتىنداعى قازۇمۋ-دىڭ رەكتورى مارات شورانوۆتىڭ، ۆالەنتين گەراين قورىنىڭ نەگىزىن قالاۋشى، قازاقستانداعى بالالار ونكوگەماتولوگيا قىزمەتىنىڭ قالىپتاسۋىنا زور ۇلەس قوسقان گەراين ۆالەنتين مىرزانىڭ جانە پەدياتريا جانە بالالار حيرۋرگياسى عىلىمي ورتالىعىنىڭ باسقارما ءتوراعاسى اباي قۇسايىنوۆتىڭ العى قۇتتىقتاۋ سوزىمەن اشىلدى.
«بالالاردىڭ قاتەرلى دەرتپەن ناۋقاستانۋى قوعام ءۇشىن اۋىر الەۋمەتتىك جانە قارجىلىق اۋىرتپالىق قانا ەمەس، سونىمەن قاتار ءار ادامنىڭ؛ انالاردىڭ، بالانىڭ تۋعان-تۋىسى، دارىگەرلەر مەن مەديسينا قىزمەتكەرلەرىنىڭ جۇرەگىن سىزداتاتىن تراگەديا. ۇزاق ۋاقىت بويى، بۇكىل الەمدە جانە ەلىمىزدە قاتەرلى دەرتكە شالدىققان بالالاردىڭ بارلىعى دەرلىك قايتىس بولاتىن. سوندىقتان 30 جىل بۇرىن پەدياتريا جانە بالالار حيرۋرگياسى عىلىمي ورتالىعىنىڭ بازاسىندا «كەر-گەرمانيا» قايىرىمدىلىق قوعامىنىڭ بەلسەندى كومەگىمەن رەسپۋبليكالىق بالالار ونكوگەماتولوگيالىق ورتالىعىن ۇيىمداستىرۋ تۋرالى شەشىم قابىلداندى. كوپ جىل بويى مەملەكەت تاراپىنان ونكوگەماتولوگيالىق اۋرۋلارى بار بالالارعا كومەك كورسەتۋ ماسەلەلەرىنە باسا نازار ءبولىنىپ كەلەدى. ونكولوگيالىق جانە گەماتولوگيالىق اۋرۋلارى بار بالالار دياگنوستيكا مەن ەمدەۋدىڭ كلينيكالىق حاتتامالارىنا سايكەس بارلىق دارىلىك زاتتارمەن، ونىڭ ىشىندە امبۋلاتوريالىق كەزەڭدە رەسپۋبليكالىق بيۋدجەت ەسەبىنەن قامتاماسىز ەتىلەدى. استانا قالاسىنداعى انا مەن بالا ۇلتتىق عىلىمي ورتالىعىندا ونكولوگيا جانە گەماتولوگيا بولىمشەلەرى اشىلدى. گەموپوەزدىك ءدىڭ جاسۋشالارىن ترانسپلانتتاۋ تەحنولوگيالارى ءساتتى ەنگىزىلدى، قر-دا بالالار ونكولوگيالىق جانە گەماتولوگيالىق كومەگىن جەتىلدىرۋ بويىنشا جول كارتالارى ازىرلەنىپ، ىسكە اسىرىلدى. بيىل ونكولوگيالىق اۋرۋلارمەن كۇرەس بويىنشا كەشەندى ءىس-شارالار جوسپارى ازىرلەندى. سونداي-اق دەنساۋلىق ساقتاۋ مينيسترلىگى ەرتە دياگنوستيكا، مامانداندىرىلعان ەمدەۋدى جەتىلدىرۋ، جوعارى تەحنولوگيالىق قىزمەتتەر سپەكترىن كەڭەيتۋ، كادرلىق الەۋەتتى جەتىلدىرۋ جانە عىلىمدى دامىتۋ جونىندەگى ءىس-شارالاردى ىسكە اسىرۋدى كوزدەپ وتىر»، – دەدى دەنساۋلىق ساقتاۋ ۆيسە-مينيسترى ۆ.دۋدنيك.
فورۋم الاڭىندا بالالاردىڭ قاتەرلى ىسىگىن، قان اۋرۋلارىن ەمدەۋ سالاسىنداعى وزەكتى تاقىرىپتاردىڭ كەڭ اۋقىمى، بالالىق شاقتاعى ونكولوگيالىق جانە گەماتولوگيالىق اۋرۋلاردى دياگنوستيكالاۋ مەن ەمدەۋدەگى زاماناۋي تاسىلدەر، بالالار ونكولوگياسى مەن گەماتولوگياسىنداعى حيرۋرگيانىڭ زاماناۋي مۇمكىندىكتەرى، ونكوگەماتولوگيالىق قىزمەتتى ۇيىمداستىرۋ جانە ت.ب. بالالار ونكولوگياسى مەن گەماتولوگياسى سالاسىنداعى وزەكتى ماسەلەلەر تالقىلاندى.