ينستيتۋتتا 6 ماماندىق جانە 14 بىلىكتىلىك بويىنشا ماماندار دايىندالادى. وقۋ مەرزىمى – 4 جىل
اسكەري ماماندىق العىسى كەلەتىندەر ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىنا تۇسە الادى. وكق وتكەن بريفينگتە ينستيتۋت باستىعىنىڭ وقۋ جانە عىلىمي جۇمىس جونىندەگى ءبىرىنشى ورىنباسارى، پولكوۆنيك جانىبەك سارگازين وقۋ ورنىنا قابىلداۋ، ىرىكتەۋ ەرەجەلەرى جانە وقۋ پروسەسى تۋرالى باياندادى، دەپ حابارلايدى almaty-akshamy.kz
ونىڭ ايتۋىنشا، قازاقستان رەسپۋبليكاسى قارۋلى كۇشتەرىنىڭ، اسكەري قۇرالىمدارىنىڭ جانە باسقا دا اسكەرلەرىنىڭ وفيسەرلىك قۇرامىنىڭ 80% استامى ينستيتۋت تۇلەكتەرىنىڭ ەسەبىنەن تولىقتىرىلادى.
«ينستيتۋتتىڭ نەگىزگى مىندەتى – قۇرلىق اسكەرلەرىنىڭ جوعارى مامانداندىرىلعان وفيسەرلەرىن دايارلاۋ. قازاق اسكەرى ءۇشىن وفيسەرلەر دايىنداۋدا ۇستاحاناعا اينالعان وقۋ ورنىمىز قاشاندا الدىڭعى قاتاردا. ينستيتۋت زاماناۋي وقۋ-ادىستەمەلىك بازامەن، تەحنيكالىق وقۋ قۇرالدارىمەن قامتاماسىز ەتىلگەن. ينستيتۋتتىڭ لەكسيالىق اۋديتوريالارى مەن كابينەتتەرى اسكەري مامانداردى دايارلاۋعا قاجەتتىنىڭ بارىمەن جابدىقتالعان»، - دەدى ول.
ينستيتۋتتا 6 ماماندىق جانە 14 بىلىكتىلىك بويىنشا ماماندار دايىندالادى. وقۋ مەرزىمى – 4 جىل. وسى ۋاقىتتا كۋرسانتتار ءۇش مەزگىل تەگىن تاماقپەن، اقشالاي ستيپەنديا جانە اسكەري كيىممەن قامتاماسىز ەتىلەدى.
«كۋرسانتتارعا تەگىن مەديسينالىق كومەك كورسەتىلەدى. دەمالىس جىلىنا ەكى رەت بەرىلەدى: قىستا ون ءتورت كۇن، جازدا ءبىر اي. شاكىرتاقىعا كەلەتىن بولساق، ونىڭ مولشەرى 1-2 كۋرس ءۇشىن 12 627 تەڭگە، 3-4 كۋرس ءۇشىن 21 915 تەڭگە. ينستيتۋتتا بولاشاق وفيسەرلەردى دايىنداپ، ساپالى جوعارى ءبىلىم الۋ ءۇشىن بارلىق جاعداي جاسالعان»، - دەپ قوسىپ ءوتتى ج. سارگازين.
سپيكەردىڭ ايتۋىنشا، ۇمىتكەرلەردىڭ جارامدىلىعىن دەنساۋلىق جاعدايىن، پسيحولوگيالىق جانە فيزيكالىق دايىندىعىن باعالاۋ كەزىندە كوميسسيا انىقتايدى.
- 50 جىلدىق تاريحى بار وقۋ ورنى 17 مىڭنان استام بىلىكتى وفيسەر دايىنداپ شىعاردى. 85-تەن استام گەنەرال شىعاردى، ولاردىڭ اراسىندا قىزمەتىن جالعاستىرىپ جاتقاندارى دا بار، - دەپ قورىتىندىلادى سپيكەر.