جامبىل وبلىسىندا ۇرلانعان قارۋدى عانا ەمەس، جالپى زاڭسىز اينالىمداعى قارۋدى تابۋ جانە تاركىلەۋ بويىنشا ماقساتتى جۇمىستار جالعاسىپ جاتىر.
كەزەكتى قارۋ جاسىرىلعان ورىندى 2023 جىلعى 12 اقپاندا جامبىل وبلىسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى تاپتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
تاراز قالاسىنىڭ اراي يىنىندە 2022 جىلعى قاڭتاردا الماتى قالاسىنداعى قارۋ-جاراق دۇكەنىنەن ۇرلانعان 308 Win كاليبرلى Benelli Argo-E كارابين مىلتىعى جانە پاترونىمەن بىرگە 9 مم كاليبرلى SM Action گاز تاپانشاسى تابىلىپ، تاركىلەندى.
«اتالعان دەرەككە قاتىستى سوت-بالليستيكالىق ساراپتاماسى تاعايىندالدى. ق ر قك-نىڭ 287-بابىنىڭ 3-بولىگى (قارۋدى، وق-دارىلەردى جارىلعىش زاتتار مەن قۇرىلعىلاردى زاڭسىز ساتىپ الۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ) بويىنشا سوتقا دەيىنگى تەرگەۋ امالدارى جۇرگىزىلىپ جاتىر. جەدەل ىزدەستىرۋ ءىس-شارالارى بارىسىندا ءبىزدىڭ قىزمەتكەرلەر قارۋ-جاراقتاردى انىقتاۋدى جانە ولاردى زالالسىزداندىرۋدى جالعاستىرىپ جاتىر»، – دەدى پد ەققىب باستىعى ءالىم باجىقبايەۆ.