ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى اسكەري بولىمدەردە كەڭەس اسكەرىنىڭ اۋعان جەرىنەن شىعارىلعانىنا 34 جىل تولۋىنا وراي اۋعان سوعىسىنىڭ ارداگەرلەرىمەن كەزدەسۋ كەشتەرى ءوتتى.
اسكەري بولىمدەردەگى ساربازدارمەن كەزدەسۋ كەشىن وتكىزگەن ينتەرناسيوناليست-جاۋىنگەرلەر، اتاپ ايتقاندا گەنناديي دميترييەۆيچ، الەكساندر الەكساندروۆيچ، ەگىزباي بوتاتاي ۇلى، الەكساندر نيكولايەۆيچ جانە قالىبەك امانگەلدى ۇلى اۋعان سوعىسىنداعى ەستەلىكتەرىنەن باستاپ، ىشكى اسكەر مەن ۇلتتىق ۇلانداعى قىزمەت جولدارىنان ءبىراز اڭگىمە تارقاتتى. اعا بۋىن جاۋىنگەرلەردىڭ اڭگىمەسىنەن اسەرلەنىپ شىققان جاس جاۋىنگەرلەردىڭ كوزىنەن ەرەكشە ۇشقىن بايقالدى. بۇل – ۇيىماستىرىلعان ءىس-شارانىڭ ماقساتى ورىندالدى دەگەن ءسوز. ينتەرناسيونال-جاۋىنگەردىڭ ءسوزى جاس بۋىننىڭ ساناسىنا وي سالدى، جۇرەگىنە جەتتى. باستى ماقسات تا سول ەدى.
كەزدەسۋ بارىسىندا ساربازدار وزدەرىن قىزىقتىرعان سۇراقتارىن قويىپ، تۇششىمدى جاۋاپتار الدى. ارداگەرلەر ءوز ويلارىمەن ءبولىسىپ قانا قويماي، جاۋىنگەرلەرگە بەيبىت ءومىردى ساقتاۋعا، ءتۇرلى ارانداتۋشىلىققا بوي الدىرماۋعا، وتاندى قورعاۋ ىسىندە ادالتىق تانىتۋعا شاقىردى. ولاردىڭ ءاربىر ءسوزى، ءاربىر ىس-ارەكەتى – كەيىنگى ۇرپاققا ۇلگى. الدى ەگدە تارتا باستاعان، سوڭى جىگىت اعاسى بولىپ قالعان اۋعان سوعىسىنىڭ ارداگەرلەرى ءبولىم باسشىلىعى تاراپىنان العىس حاتپەن ماراپاتتالدى.