الماتىدا قاڭتار وقيعاسى كەزىندە بۇلىنگەن پرەزيدەنت رەزيدەنسياسىن بۇزۋعا جارىلعىش زاتتار قولدانىلمايدى، دەپ حابارلايدى اlmaty-akshamy.kz «حابار 24»-كە سىلتەمە جاساپ.
قاڭتار وقيعاسى كەزىندە ورتەنگەن پرەزيدەنت رەزيدەنسياسىنىڭ ىشىندە ىستىڭ ءيىسى ءالى دە كەتپەگەن. تەمىر باعانالار بالقىپ، بەتون قابىرعالاردىڭ بەرىكتىگى بۇزىلعان. 19 مىڭنان استام شارشى مەتردى الىپ جاتقان الىپ عيماراتتى بۇزۋدىڭ ءوزى تەحنيكالىق تۇرعىدان وتە كۇردەلى جۇمىس. سوندىقتان سۇرۋگە 3 ملرد تەڭگە قاجەت. تاعى 3 ملرد تەڭگە اۋماقتى قالپىنا كەلتىرۋگە جانە ينجەنەرلىك كورپۋستى قايتا قۇرىلىمداۋعا جۇمسالادى. «ولار كەيىن قالانىڭ بالانسىنا وتەدى»، – دەيدى ماماندار.
عيمارات قۇرىلىمىندا التى مىڭ شارشى مەتر تەمىربەتون بار. ونى بىر-بىرىنەن اجىراتىپ، بولشەكتەۋگە گيدراۆليكالىق بالعاسى بار ارنايى تەحنيكا قولدانىلادى. وسى ۋاقىتقا دەيىن رەزيدەنسيادا تەك تازالاۋ جۇمىسى عانا اتقارىلىپتى. ال قاشان بۇزىلا باستايتىنى ازىرگە بەلگىسىز.
ورتتەن بىرەن-ساران دۇنيە امان قالىپتى. سونداي 46 اتاۋلى قۇرال-جابدىق رەزيدەنسيادان شىعارىلادى. ساقتاۋلى تۇرعان توڭازىتقىش تەحنيكالارى مەن ديزەل-گەنەراتورلاردىڭ جالپى سوماسى 600 ملن تەڭگە بولادى. بۇل قۇرال-جابدىقتار پرەزيدەنت ءىس باسقارماسىنىڭ باسقا دا نىساندارىنا بەرىلەدى. تاعى 150 ملن تەڭگە مەتالدى قايتا وڭدەۋدەن تۇسەدى. جالپى عيماراتتى بۇزۋعا كەتكەن شىعىننىڭ 750 ملن تەڭگەسى بيۋدجەتكە قايتارىلادى. ال رەزيدەنسيا سۇرىلگەن سوڭ ورنىنا ساياباق سالۋ جوسپارلانعان.