پەدياتريا ورتالىعىندا جىلىنا ەلىمىزدىڭ ءار وڭىرىنەن 6000-عا جۋىق بالا ەم الادى
1 ماۋسىم كۇنى پەدياتريا جانە بالالار حيرۋرگياسى عىلىمي ورتالىعىندا حالىقارالىق بالالاردى قورعاۋ كۇنىنە وراي، قاتەرلى دەرتكە جانە سيرەك كەزدەسەتىن اۋرۋلارعا شالدىققان بالالار ءۇشىن مەرەكەلىك شارا وتەدى، دەپ حابارلايدى Almaty-akshamy.kz.
شارانىڭ باستى ماقساتى – ونكولوگيالىق دەرتكە شالدىققان بالالارعا مەرەكە، قۋانىش سىيلاۋ، «اتى جامان» اۋرۋدى جەڭۋگە دەگەن سەنىم ۇيالاتۋ، كوڭىلدەرىن كوتەرۋ ارقىلى ءبىر ساتكە اۋرۋىن ۇمىتتىرۋ، اتا-انالار مەن بالالارعا پسيحولوگيالىق قولداۋ كورسەتۋ. پەدياتريا ورتالىعىندا جىلىنا ەلىمىزدىڭ ءار وڭىرىنەن 6000-عا جۋىق بالا ەم الادى، ونىڭ 2500-دەن استامى ونكوگەماتولوگيالىق اۋرۋلارعا شالدىققان بالالار.
شاراعا ورتالىقتىڭ دارىگەرلەرى، پسيحولوگتارى مەن تاربيەشىلەرى جانە ونكوگەماتولوگيا بولىمدەرىندە ەم الىپ جاتقان كىشكەنتاي پاسيەنتتەر قاتىسادى. بالالاردى قۇتتىقتاۋعا قازاق ەستراداسىنىڭ جۇلدىزدارى جولبارىس سەيفۋللين مەن اللابەرگەن جاقسىبايەۆ، «براز سيكستەت» وركەسترى، «شۋ-شۋ» اسپاپتىق دۋەتى، «ۋلميرا» شوۋ-بالەتى جانە سيقىرشى-فوكۋسنيك پانوۆ ۆلاديسلاۆ ارنايى كەلەدى. ونەر جۇلدىزدارىمەن بىرگە ورتالىقتا ەم الىپ جاتقان بالالار دا ونەر كورسەتەدى.
شارا اياسىندا بالالاردىڭ سۋرەت كورمەسى، جىل سايىنعى اسفالتقا سۋرەت سالۋ بايقاۋى، كەسكىندەمە بويىنشا شەبەرلىك سىنىبى وتەدى. بالالار ءۇشىن ارنايى اكۆاگريم مەن فوتوسەسسيالار ۇيىمداستىرىلادى. ورتالىقتىڭ كروحا ەسىمدى اۋرۋحانا كلوۋنى بالالارعا ارنالعان ارنايى بايقاۋلار مەن قىزىقتى ويىندار وتكىزەدى. شاراعا ارنايى شاقىرىلعان 5 انيماتورلار توبى بالالارعا مەرەكەلىك كوڭىل-كۇي سىيلايتىن بولادى. سونىمەن قاتار، قازاقستان قور بيرجاسىنىڭ ەرىكتى انيماتورلارىنىڭ دايىنداۋىندا فلەشموب وتكىزۋ جوسپارلانۋدا. ءىس-شارا شاعىن ديسكوتەكامەن جانە بالالارعا ارنالعان مەرەكەلىك سىيلىقتاردى تابىستاۋمەن اياقتالادى.
شارا «اسىل بالا»، «Help Today»، «اميلا»، «جاڭا ءومىر» قايىرىمدىلىق قورلارى مەن قازاقستان قور بيرجاسى جانە «ەير استانا» كومپانياسىنىڭ دەمەۋشىلىگىمەن وتەدى.