الماتىداعى مەشىتتە ۇرلىق جاساپ جۇرگەندەر قولعا ءتۇستى

ولار ءوز كىنالارىن مويىنداپ، ىستەگەن ىستەرىنە وكىندى.

قالانىڭ بوستاندىق اۋدانىنىڭ پوليسەيلەرى مەشىتتە جاسالعان جەتى ۇرلىقتىڭ بەتىن اشتى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«جەدەل ىزدەستىرۋ ءىس-شارالارى بارىسىندا 29 جانە 34 جاستاعى جۇمىسسىز ەر ادامدار ۇستالدى. ك.ەسىمدى ازاماتتىڭ بەس قىلمىسقا قاتىستىلىعى دالەلدەندى، ونىڭ «ارىپتەسى» ە.ەسىمدى ازامات زاڭسىز ارەكەتتەردىڭ ەكى دەرەگىن جاساعان. ەكى ايىپتالۋشى دا شاھاردىڭ ءىرى مەشىتتەرىنىڭ بىرىندە بىرنەشە ۇرلىق جاساعان. زارداپ شەككەندەردىڭ ايتۋىنشا، ولار ناماز كەزىندە تەلەفوندارىن اياقتارىنىڭ استىنا ەدەنگە قويعان. نامازدان كەيىن ولار تەلەفوندارىن جوعالتقانىن بايقاعان. ۇستالعاندار ۇرلىققا قاتىسى بارىن جوققا شىعارمايدى. ولار ءوز كىنالارىن مويىنداپ، ىستەگەن ىستەرىنە وكىندى. قىلمىستىق ءىس ق ر قك-نىڭ 188-بابى بويىنشا تىركەلدى. كۇدىكتىلەردىڭ قالانىڭ باسقا دا اۋداندارىندا جاسالعان وسىعان ۇقساس قىلمىستارعا قاتىسى بار-جوعىن تەكسەرۋدەمىز. قازىرگى ۋاقىتتا قاجەتتى تەرگەۋ امالدارى جۇرگىزىلىپ جاتىر»، – دەدى بوستاندىق اۋداندىق پوليسيا باسقارماسىنىڭ باستىعى ماقسات قاناپيايەۆ.