جول بەلگىلەرىن سالۋعا 17،7 ملن تەڭگە جۇمساۋ جوسپارلانىپ وتىر.
الماتى قالاسىنداعى جول بويىنداعى كوممۋنالدىق اشىق جانە جابىق اۆتوتۇراقتار ەندى جەكە اۆتوتۇراقتاردان ەرەكشەلەنىپ، كوك تۇسپەن بەلگىلەنەدى. بۇل تۋرالى الماتى قالاسىنىڭ اقىلى اۆتوتۇراقتارىن ۇيىمداستىرۋ ەرەجەلەرىن بەكىتۋ تۋرالى ەرەجەلەرىنە ەنگىزىلەتىن وزگەرىستەردەن بەلگىلى بولدى. كوك ءتۇستى جول بەلگىلەرىن سالۋعا قالا بيۋدجەتىنەن 17،7 ملن تەڭگە جۇمساۋ جوسپارلانىپ وتىر، دەپ حابارلايدى اlmaty-akshamy.kz.
جوبادا، سونداي-اق بۇعان دەيىن بەلگىلى بولعانداي، ەلەكتروندى تولەم تەرمينالدارىنىڭ الىنىپ تاستالاتىنى جازىلعان. وعان سەبەپ – قازىرگى تاڭدا تولەمدەردىڭ 98 پايىزى بانكتىك اۋدارىم ارقىلى جۇزەگە اسىرىلاتىنى
"QR كود سكانەرى بارلىق سمارتفوندارعا ورناتىلعان، سوندىقتان QR كودى قولما-قول اقشاسىز تولەم جاساۋدىڭ ەڭ قولجەتىمدى، ىڭعايلى جانە جىلدام قۇرالدارىنىڭ بىرىنە اينالدى، ويتكەنى QR كود ارقىلى تولەۋ كارتا تولەمدەرىن قوسىمشا قۇرالدارسىز قابىلداۋدان ەرەكشەلەنەدى. ءوز كەزەگىندە ەلەكتروندى تەرمينالداردى ۇستاۋ، ەلەكتروندى تەرمينالداردان اقشا جيناۋ، سونداي-اق ولاردىڭ قاۋىپسىزدىگىن قامتاماسىز ەتۋ قوسىمشا قارجىلىق شىعىنداردى تالاپ ەتەدى"، – دەلىنگەن جوبانىڭ تۇسىندىرمە جازباسىندا.
ەسەسىنە، كوممۋنالدىق اقىلى اۆتوتۇراق ورنالاسقان جول بويىنا بوس ورىندار سانىن كورسەتەتىن ەلەكتروندىق قۇرىلعىلار ورناتىلۋى مۇمكىن.
ەسكە سالايىق، الماتى قالاسىنىڭ اۆتوتۇراقتارى مەنشىك تۇرىنە بايلانىستى كوممۋنالدىق جانە جەكە بولىپ بولىنەدى:
كوممۋنالدىق اۆتوتۇراق – نىسانالى ماقساتىنا سايكەس پايدالانۋ ءۇشىن الماتى قالاسىنىڭ كوممۋنالدىق مەنشىگىندەگى ۋاكىلەتتى ورگان ۇيىمداستىرعان جانە زاڭنامامەن بەلگىلەنگەن تارتىپتە پايدالانۋعا بەرۋشى ۇيىمنىڭ باسقارۋىنا بەرىلگەن اۆتوتۇراق؛
جەكە مەنشىك اۆتوتۇراق – نىسانالى ماقساتىنا سايكەس جەردى پايدالانۋ قۇقىعىنا نە جەر تەلىمىنىڭ مەنشىك قۇقىعىنا يە مەملەكەتتىك ەمەس زاڭدى تۇلعا نەمەسە جەكە كاسىپكەر ۇيىمداستىرعان اۆتوتۇراق.