الماتىدا تۇركىتىلدەس جۋرناليستەر قورىنىڭ ۇيىمداستىرۋىمەن ءىىى حالىقارالىق تۇركىتىلدەس جۋرناليستەر مەديا فورۋمى ءوتتى. ەلىمىزدىڭ ءار ايماعى مەن وزبەكستان، تۇركيا، قىرعىزستان، ءازىربايجان، بەلگيا، بريتانيا، نيدەرلاند ەلدەرىنىڭ ب ا ق باسشىلارى، جۋرناليستەر، مەديا سالاسىنداعى ۇكىمەتتىك ەمەس ۇيىمداردىڭ وكىلدەرى، جوو جۋرناليستيكا فاكۋلتەتتەرىنىڭ وقىتۋشىلارى قاتىستى.
فورۋم الدىندا گالا-بانكەت ۇيىمداستىرىلىپ، «ەركىن ءسوز – 2023» جانە «الەۋمەت – قوعام ايناسى» بايقاۋلارىنىڭ جەڭىمپازدارى ماراپاتتالدى. «تۇركىتىلدەس جۋرناليستەر قورى» قوعامدىق قورى ۇيىمداستىرۋىمەن جانە «حالىق بانك» اق دەمەۋشىلىگىمەن وتكەن جۋرناليستەر اراسىنداعى «ەركىن ءسوز» شىعارماشىلىق بايقاۋىنىڭ قورىتىندىسى بويىنشا «ۇزدىك تەلەسيۋجەت» نوميناسياسىن گۇلنار تايجان، «ۇزدىك ماقالا» نوميناسياسىن قۇندىز قابىلدەنوۆا، «سايتتاعى ۇزدىك ماقالا» نوميناسياسىن «ايقىن» سايتىنىڭ ءتىلشىسى جادىرا ءمۇسىلىم يەلەندى. سونداي اق جولداسبەك دۋاناباي اتىنداعى ارنايى سىيلىقپەن ادىلەت قانات، اينۇر سىدىقوۆا اتىنداعى ارنايى سىيلىقپەن قالقامان نۇرلىحان، ساكەن ورىنباسار ۇلى اتىنداعى ارنايى سىيلىقپەن التىناي جەتپىسبايەۆا ماراپاتتالدى. ال الەۋمەتتىك سالانى دامىتۋعا ۇلەس قوسىپ جۇرگەن جوبالاردى ەلگە ناسيحاتتاۋ ماقساتىندا ۇيىمداستىرىلعان «الەۋمەت – قوعام ايناسى» بايقاۋىنان جەڭىمپاز اتانعان ءۇش جۋرناليست قالمۇرات داۋلەتبايەۆ – 3 ورىن، اقبوتا مۇسابەك – 2 ورىن، ەلميرا جۇرسىنبەك قىزى 1 ورىندى يەلەندى.
فورۋمدا وتاندىق جانە شەتەلدىك مەديا ساراپشىلار تۇركى مەملەكەتتەرىنىڭ اقپاراتتىق ىنتىماقتاستىعى، كاسىبي ەتيكا، قۇقىق جانە اقپاراتتىق قاۋىپسىزدىك ماسەلەلەرىن تالقىلادى. سونىمەن قاتار، كونتەنتتى مونەتيزاسيالاۋ ماسەلەلەرى، جاساندى ينتەللەكت ترەندتەرى مەن ونى مەديا كەڭىستىكتە قولدانۋ تاقىرىبى تالقىلانىپ، ترەنينگ وتكىزىلدى
فورۋم اياسىندا «پسيحولوگيالىق قىسىم جانە ەموسيانى باسقارۋ»، «ەمپاتيا» تاقىرىبى بويىنشا مەدياترەنەر جانيا بيسەنوۆا جان-جاقتى ءتۇسىندىرىپ، توپپەن تاجىريبەلىك جۇمىس جۇرگىزدى. سەمينار ترەننيگ بارىسىندا قاتىسۋشىلار بىر-بىرىمەن قىزۋ پىكىر الماستى. اسىرەسە، «سوعىس، زورلىق-زومبىلىق، تابيعي اپاتتار قۇرباندارىمەن سۇحبات الۋ، قارىم-قاتىناس جاساۋدىڭ پسيحولوگيالىق تاسىلدەرى» تاقىرىبىندا قاتىسۋشىلار جان-جاقتى پىكىر ايتىپ تارتىستى بولدى. XXI عاسىردىڭ وتە وزەكتى ماسەلەسى «جاساندى ينتەللەكتتى جۋرناليستيكادا پايدالانۋ» تاقىرىبىن ءسوز ەتكەن مەدياترەنەر مەيىرجان اۋەلحان ۇلى تىڭ ويلارىمەن كوپشىلىكتى ءتانتى ەتتى. سەمينار-ترەنينگ بارىسىندا بۇگىنگى كۇنى تانىمال، ءارى سۇرانىسقا يە تەحنولوگيا – جاساندى ينتەللەكتپەن جۇمىس ىستەۋ، تاجىريبەگە ەنگىزۋدى ۇيرەندى.
«مەديافورۋمدا ءبىز قازاقستان مەن تۇركى ەلدەرىنەن جينالعان ارىپتەستەرىمىزبەن بىرگە مەديا سالاسىنداعى تۇيتكىلدەر مەن ولاردى شەشۋدىڭ جولدارىن قاراستىرىپ وتىرىپ، ورتاق جوبالار جاساۋدى كەڭەسەمىز. باستى ماقساتىمىز – ءتۇبى ءبىر تۇركىنىڭ تاريح، رۋحانيات، ونەر، ەكونوميكا مەن ساياساتىن تۇركى حالىقتارىنا ناسيحاتتاۋ، ولاردى بىر-بىرىنە جاقىنداستىرۋ. وكىنىشكە قاراي، 70 جىلعا جۋىق ۇستەمدىك قۇرعان كەڭەستەر وداعى باۋىرلاس حالىقتاردى بىر-بىرىنە جات قىلدى. ءالىپبيىن وزگەرتۋ ارقىلى قازاق، قىرعىز، وزبەك، تۇركىمەن، تاتار، باشقۇرت، قاراقالپاق، تاعى باسقا ۇلتتاردىڭ اراسىنداعى باۋىرلاستىق بايلانىستى ۇزۋگە تىرىستى. ءبىز، تۇركى ەلدەرىنىڭ اقپارات قۇرالدارى مەن جۋرناليستەرى وسى ولقىلىقتاردىڭ ورنىن تولتىرۋعا كۇش سالۋىمىز قاجەت. ول ءۇشىن قىسقامەرزىمدى جانە ۇزاقمەرزىمدى ستراتەگيالىق جوسپارلاردى قۇرا وتىرىپ، ماقساتتى دا ۇزدىكسىز دامۋعا مۇددەلىمىز»، – دەدى «تۇركىتىلدەس جۋرناليستەر قورى» قق جەتەكشىسى ءنازيا جويامەرگەن قىزى.
بەلگيالىق جۋرناليست يۋسۋف دجينالدىڭ پىكىرىنشە، تۇركى مەملەكەتتەرىنىڭ باق-تارىندا بىرلەسىپ جۇمىس ىستەۋ ءۇشىن كوپ مۇمكىندىك بار. ماسەلەن، باۋىرلاس ەلدەر مەديا نارىعىنا قاجەتتى كادرلاردى دايارلاپ، تاجىريبە الماسا الادى دەپ ەسەپتەيدى.
«ءبىر كەزدەرى جىبەك جولى ارقىلى ساۋدا جاساعاندار سونىمەن قاتار اقپارات جەتكىزۋشىلەر دە بولاتىن. ءبىز جۋرناليستەر اقپاراتتى ءبىر دەرەككوزدەن الىپ، ەكىنشى ءبىر دەرەككوزگە جەتكىزۋشىمىز. وسى قىزمەتتى اتقارۋ بارىسىندا بىزگە جۇكتەلگەن جاۋاپكەرشىلىك پەن زور ميسسيا بار. ءبىز ءوزىمىزدىڭ ءدىلىمىزدىڭ، ءتىلىمىزدىڭ، ەلىمىزدىڭ وكىلى بولامىز. ءقازىر جىبەك جولىنىڭ مىندەتىن ونلاين ب ا ق ءوزىنىڭ مىندەتىنە الىپ، اتقارىپ وتىر. مەن ءوزىم تۇركيادا ءارى ەۋروپادا جۋرناليست رەتىندە قىزمەت ەتەمىز. ءوزىمىزدىڭ مۇمكىندىكتەرىمىزدى پايدالانا وتىرىپ، ءوزىمىز ءۇشىن ءارى تۇركى مەملەكەتتەرى ءۇشىن ءجۇرلى جوسپار قۇرىپ، جۇمىس ىستەي الامىز. البەتتە ول ءۇشىن ءوزىمىزدىڭ قارىم قابىلەتىمىز بەن ءبىلىم بىلىكتىلىگىمىزدى بىرىكتىرۋىمىز قاجەت. مىسالى، الماتىدا وتىرعان ءبىر جۋرناليست ەۋروپانىڭ كەز كەلگەن ەلىندەگى مەديادا جۇمىس ىستەي الادى. ياعني ماڭىزدى اقپاراتتاردى، تۇركى ەلدەرىنە ورتاق قۇندىلىقتاردى ناسيحاتتاي الامىز. الداعى ۋاقىتتا تۇركى تىلدەس جۋرناليستەرى قورىمەن بىرلەسىپ ەۋروپاداعى ۇكىمەتتىك ەمەس ۇيىمدارمەن بىرگە ءبىرقاتار جۇمىستى قولعا الامىز. مۇنداي جوبالاردى تۇركياداعى ارىپتەستەرمەن بىرلەسىپ جاساپ ءجۇرمىز، ەندىگى كەزەك قازاقستاندا»، – دەدى بەلگيالىق جۋرناليست يۋسۋف دجينال.
