قولدانىستاعى مارشرۋتتاردىڭ سىزباسىنا وزگەرىستەر ەنگىزىلدى.
الماتى ءماسليحاتىنىڭ اعىمداعى جىلعا ارنالعان جەرگىلىكتى بيۋدجەتتى ناقتىلاۋ جونىندەگى XXX سەسسياسى بارىسىندا قالاداعى قوعامدىق كولىك ماسەلەسى ءسوز بولدى، دەپ حابارلايدى Almaty-akshamy.kz.
«بۇگىنگى كۇنى قالامىزدىڭ قوعامدىق كولىك جۇيەسى 158 باعىتتىق جەلىدەن تۇرادى. وزدەرىڭىزگە ءمالىم، قوعامدىق كولىكتە ءجۇرۋ قۇنى 80 تەنگە. قوعامدىق كولىكتىڭ شىنايى ەسەپتىك قۇنى بەكىتىلگەن تاريفتەن الدەقايدا جوعارى، شامامەن ورتا ەسەپپەن 300 تەنگەنى قۇرايدى. سول سەبەپتى بارلىق مارشرۋتتار الەۋمەتتىك ماڭىزى بار دەپ تانىلعان»، - دەدى الماتى قالاسى قالالىق ۇتقىرلىق باسقارماسى باسشىسىنىڭ م.ا. ەرنۇر ءابجاحان.
ونىڭ ايتۋىنشا، ق ر «اۆتوموبيل كولىگى تۋرالى» زاڭىنىڭ 14-بابى 1-تارماعىنىڭ 5-تارماقشاسىنا سايكەس، وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ جەرگىلىكتى وكىلدى ورگاندارى الەۋمەتتىك ماڭىزى بار قاتىناستاردىڭ تىزبەسىن ايقىندايدى.
«بۇعان دەيىن 2020 جىلدىڭ 18 ناۋرىزىندا باعىتتاردىڭ ءتىزىمى بەكىتىلگەن بولاتىن. جولاۋشىلاردىڭ قاجەتتىلىگىنە جانە قالاعا قوسىلعان اۋدانداردى قامتۋدىڭ ۇلعايۋىنا بايلانىستى جاڭا باعىتتار ۇيىمداستىرىلىپ، قولدانىستاعى مارشرۋتتاردىڭ سىزباسىنا وزگەرىستەر ەنگىزىلدى.وسىعان بايلانىستى، الماتى قالاسىندا الەۋمەتتىك ماڭىزى بار قاتىناستاردىڭ تىزبەسىن ايقىنداۋ ماقساتىندا سىزدەرگە 161 باعىتتان تۇراتىن تىزبەنى بەكىتۋ ءۇشىن شەشىمىنىڭ جوباسى ەنگىزىلدى»، - دەدى ەرنۇر ءابجاحان.