الماتىدا ونەركاسىپتىڭ اۋانى لاستاۋىن ازايتاتىن اۋقىمدى ءىس-شارالار جۇزەگە اسىرىلىپ جاتىر: كەلەر جىلدىڭ سوڭىنا دەيىن بىتەتىن جەو-2 جاڭعىرتۋ جۇمىسى شىعاتىن زياندى زاتتاردىڭ كولەمىن 13 ەسە قىسقارتۋعا مۇمكىندىك بەرەدى. وڭىرلىك كوممۋنيكاسيالار قىزمەتىندە ەكولوگيا دەپارتامەنتى باسشىسىنىڭ ورىنباسارى المات ءالقوجا وسىلاي دەدى.
المات ءالقوجانىڭ ايتۋىنشا، الماتى – حالىق تىعىز ورنالاسقان ەلىمىزدەگى ەڭ ۇلكەن قالا، مۇندا ونەركاسىپ، عىلىم مەن مادەنيەت ءبىر كەڭىستىكتە توپتاسقان. سوندىقتان ەكولوگيالىق اقپاراتتىڭ اشىقتىعى جانە مەملەكەت، بيزنەس پەن قوعام اراسىندا ءتيىمدى ىنتىماقتاستىق جاساۋ – ەكولوگيالىق قاۋىپسىزدىك پەن تۇراقتى دامۋدىڭ نەگىزگى شارتى بولىپ قالا بەرمەك.
دەپارتامەنتتىڭ قورشاعان ورتانى قورعاۋ سالاسىنداعى باقىلاۋدى كۇشەيتىپ كەلە جاتقانىن دا اتاپ ءوتتى. ءىرى تابيعات پايدالانۋشىلار شىعارىندىلاردى اۆتوماتتى تۇردە باقىلاۋ جۇيەلەرىن ەنگىزۋگە مىندەتتى، بۇل جۇيە لاستايتىن زاتتار جونىندەگى دەرەكتەردى ءدال سول ۋاقىتتا باقىلاۋعا مۇمكىندىك بەرەدى. ءبىراز كاسىپورىن ول جۇيەگە قوسىلىپ ۇلگەرگەن، ءالى دە ەنگىزىپ جاتقاندارى بار.
مەكەمە تەكسەرۋگە، ەكولوگيالىق تالاپتىڭ ساقتالۋىن تالداپ، زياندى زاتتارى ازايتىپ، قالدىقتارمەن جۇمىس ساپاسىن جاقسارتۋعا ەرەكشە كوڭىل بولەدى. الماتىنىڭ ەكولوگيالىق ماسەلەلەرىن كەشەندى شەشۋگە ارنالعان بەكىتىلگەن جول كارتاسى جەو-2 نىسانىن كەلەر جىلدىڭ سوڭىنا دەيىن جاڭعىرتپاق ويدا. بۇل – اتموسفەرالىق جۇكتەمەنى ايتارلىقتاي ازايتاتىن نەگىزگى شارۋا.
ءالقوجا ءبىراز كاسىپورىننىڭ ەكولوگياعا جاۋاپتىلىقتى كۇشەيتىپ، باستاما كوتەرىپ جاتقانىن ايتتى: ولار تازا وتىنعا كوشىپ، قۋاتتىڭ تيىمدىلىگىن ارتتىرىپ، ىشكى ەكولوگيالىق ستاندارتىن جاقسارتىپ جاتىر. دەگەنمەن، ەسكىرگەن جابدىقتى جاڭارتۋ، جۇكتەمە كوپ كەزدە زياننىڭ ەسەلەنۋى، باقىلاۋ دەرەكتەرىن ۋاقتىلى بەرۋ مەن ەكولوگيالىق مادەنيەتتى ارتتىرۋ قاجەتتىلىگى سياقتى جۇيەلى شەشىمدى تالاپ ەتەتىن ماسەلەلەر ءالى دە بار.
بريفينگ قورىتىندىسىندا ءالقوجا اشىق ديالوگ پەن بىرلەسكەن شەشىمدەر كاسىپورىنداردىڭ قورشاعان ورتاعا تەرىس اسەرىن ءتيىمدى ازايتۋعا ءارى الماتىنىڭ ەكولوگيالىق ساياساتىن نىعايتۋعا مۇمكىندىك بەرەتىنىن اتاپ ءوتتى.