الماتىدا اتاقتى سپورتشىلار «الماتى – ءبىزدىڭ ورتاق ءۇيىمىز» قالالىق باستاماسى مەن «تازا قازاقستان» رەسپۋبليكالىق باعدارلاماسى اياسىندا ءوتىپ جاتقان «جارقىن كۇز» كۇزگى ناۋقانىن قولدادى.
ناۋقاندى قولداعاندار قاتارىندا پاريج وليمپياداسىنىڭ جۇلدەگەرلەرى ناريمان قۇربانوۆ، نازىم قىزايباي، عۇسمان قىرعىزبايەۆ، الەكساندرا لە، يسلام ساتبايەۆ، وليمپيادا چەمپيونى ەرماحان يبرايموۆ جانە باسقا دا سپورتشىلار بار، دەپ حابارلايدى aqshamnews.kz.
ولار ارىپتەستەرىن جانە قالا تۇرعىندارىن اۋلا مەن قالا اۋماقتارىن تازالاۋعا اتسالىسۋعا شاقىرعان بەينەجازبا ءتۇسىردى.
«الماتى – ءبىزدىڭ ورتاق ءۇيىمىز، سوندىقتان قالانىڭ تازا ءارى كورىكتى بولۋى ءۇشىن اركىم وزىنەن باستاۋى كەرەك! مەن بۇل چەللەندجدى قابىلداپ، بۇگىن اۋلامدى قوقىستان تازالاپ جاتىرمىن»، – دەدى ناريمان قۇربانوۆ.
سونىمەن قاتار، ەكولوگيالىق ناۋقانعا الماتىنىڭ ايەلدەر جانە ەرلەر باسكەتبول كوماندالارىنىڭ ويىنشىلارى، مما سپورتشىلارى دا قوسىلدى.
«مەن بارلىق الماتىلىقتى قالىس قالماي، ەكولوگيالىق اكسياعا قاتىسۋعا جانە قالانىڭ كوركەيۋىنە ۇلەسىن قوسۋعا شاقىرامىن!» – دەپ ۇندەۋ تاستادى بوكستان الەم چەمپيوناتىنىڭ جۇلدەگەرى الۋا بالقىبەكوۆا.
وليمپيادالىق رەزەرۆتەگى بالالار-جاسوسپىرىمدەر سپورت مەكتەپتەرىنىڭ تاربيەلەنۋشىلەرى دە «جارقىن كۇز» ناۋقانىنا بەلسەندى تۇردە قاتىسىپ، قالاداعى تازالىق پەن ءتارتىپتى ساقتاۋدىڭ ماڭىزدىلىعىن تۇسىنە وتىرىپ، اۋلالاردى قوقىستان تازارتىپ جاتىر.