مەگاپوليس مەديسيناسىندا تاعى ءبىر تىڭ جاڭالىق – الاتاۋ اۋدانىندا ورنالاسقان №23 قالالىق ەمحانا بازاسىندا ۇلتتىق Primary Health Care قاۋىمداستىعىنىڭ جوباسى شەڭبەرىندە اشىلعان ۇزدىك تاجىريبەلەر ورتالىعى رەسمي تۇردە جۇمىسىن باستادى.
– بۇل ماڭىزدى وقيعانى العاشقى مەديسينالىق-سانيتارلىق كومەك جۇيەسىن نىعايتاتىن جانە الەمدىك دەڭگەيدەگى وزىق يننوۆاسيالىق ادىستەردى پراكتيكالىق قىزمەتكە ەنگىزە وتىرىپ، حالىققا مەديسينالىق كومەك كورسەتۋدىڭ جاڭا ءتيىمدى مودەلىن قۇرۋعا دانەكەر بولا الاتىن ۇلكەن قادام دەپ باعالايمىن. قۇرامىندا وتباسىلىق دارىگەر، پاتروناجدىق مەدبيكەلەر، پسيحولوگتار، الەۋمەتتىك قىزمەتكەرلەر بار ۇزدىك تاجىريبەلەر ورتالىعىنىڭ ەڭ باستى ەرەكشەلىگى – قوعامعا، الەۋمەتكە، ادامعا بەيىمدەلگەن باستاپقى مەديسينالىق-سانيتارلىق كومەكتى جۇزەگە اسىرۋ. جاڭا تۋعان سابيدەن باستاپ ەگدە جاستاعى ادامداردىڭ دەنساۋلىعىن باقىلايتىن، زاماناۋي قۇرىلعىلارمەن جابدىقتالعان ءبىزدىڭ ەڭسەلى ورتالىق ءتورت جوبا شەڭبەرىندە جۇمىس ىستەيتىن بولادى، – دەيدى №23 قالالىق ەمحانا ديرەكتورى ساۋلە احات قىزى.
ءتورت جوبانىڭ ءبىرى «تىنىشتىق بولمەسى» دەپ اتالادى. وندا كوڭىلى سىنىق، جاعدايى بولماي تۇرعان قىزمەتكەر وسى بولمەدە پسيحولوگقا جۇگىنىپ، مورالدىق جاعدايىن قالىپقا كەلتىرىپ الۋىنا بولادى. الداعى ۋاقىتتا تەك ماماندارعا عانا ەمەس، ەمحاناعا كەلەتىن تۇرعىندارعا دا سونداي كومەكتەر ۇسىنىلماق. وتباسىندا نەمەسە اينالامىزدا بولىپ جاتقان كەيبىر كەلەڭسىز وقيعالاردىڭ دەنساۋلىققا دا كەرى اسەرىن تيگىزەتىنىن ەسكەرسەك، «تىنىشتىق بولمەسىنىڭ» پايداسى ۇلكەن بولاتىنىنا سەنىمدىمىز.
ەكىنشى جوبا «ەرلەردىڭ ۇزاق جاساۋى» ءۇشىن قىزمەت كورسەتپەك. «اقىلدى تارازى» دەگەن ءۇشىنشى جوبا دا وڭتايلى بولادى دەپ وتىر ماماندار. ماسەلەن، دارىگەر الدىنا كەلگەن تۇرعىن تارازى ۇستىندە ەكى مينۋت كولەمىندە تۇرادى. وسى ۋاقىت ارالىعىندا دارىگەر ونىڭ بويىنداعى زات الماسۋ پروسەسىن ءموبيلدى قوسىمشا ارقىلى باقىلاي وتىرىپ، ناتيجەلى ەم-دوم تاعايىنداۋعا مۇمكىندىك الادى.
ال ءتورتىنشى جوبادا ورتالىق قىزمەتكەرلەرى ساپالى العاشقى شۇعىل مەديسينالىق قىزمەت كورسەتۋ داعدىلارىن ۇيرەنەدى. №23 ەمحانا جانىندا جەتى مەكتەپ، قۇقىق قورعاۋ ورگاندارى ورنالاسقان. سوندىقتان الداعى ۋاقىتتا سول مەكەمەلەردەگى قىزمەتكەرلەر دە وسى جوباعا قاتىستىرىلادى.
وسى ورايدا ايتا كەتسەك، 46 100 ادام تىركەلگەن №23 ەمحانا بۇگىن عانا ەمەس، حالىققا 11 جىلدان بەرى قىزمەت كورسەتىپ كەلەدى. ونداعى ماماندار ۇلتتىق Primary Health Care قاۋىمداستىعىنىڭ جوباسى اياسىندا بىرنەشە اي بويى وقىتۋ كۋرستارىنان وتكەن بولاتىن. ناتيجەسىندە قالا بويىنشا اتالعان جوبانىڭ بارلىق تالابىنا سايكەس كەلگەن ەمحاناعا بۇگىن «ۇزدىك تاجىريبەلەر ورتالىعى» دەگەن جاڭا ماربەتە بەرىلىپ وتىر.
رەسپۋبليكا كۇنى قارساڭىندا اشىلعان ايتۋلى ورتالىقتىڭ اشىلۋ سالتاناتىنا الماتى قالاسى مەن الاتاۋ اۋدانى اكىمدىكتەرىنىڭ ماماندارى، تمد ەلدەرىنەن كەلگەن دەلەگاسيا، سونداي-اق ەلىمىزدەگى ۇزدىك تاجىريبەلەر ورتالىقتارىنىڭ قىزمەتكەرلەرى قاتىسىپ، جاڭا دا جاۋاپتى مارتەبەگە يە بولعان ماماندارعا ساتتىلىك تىلەدى.