پرەمەر-مينيستردىڭ ورىنباسارى سەرىك جۇمانعارين دوللاردىڭ قىمباتتاۋى ەلىمىزدەگى ازىق-تۇلىك باعاسىنا اسەر ەتپەيتىنىن ايتتى، دەپ حابارلايدى aqshamnews.kz.
«ءبىز الەۋمەتتىك ماڭىزى بار تاۋاردىڭ 10 ءتۇرى بويىنشا (ۇن، تۇز، كۇرىش، ماكارون، ماي، كارتوپ، قوي ەتى، سيىر ەتى، ءسابىز) ءوزىمىزدى 100% قامتاماسىز ەتىپ وتىرمىز. 14 تاۋار بويىنشا قامتاماسىز ەتۋ كورسەتكىشى – 80%، 5 تاۋار بويىنشا يمپورتقا تاۋەلدىلىك بار. قۇس ەتىمەن قامتاماسىز ەتۋ كورسەتكىشى – 73%، شۇجىق (كولباسا) – 60%، بالىق – 60%، ىرىمشىك پەن سۇزبە – 46%، قانت – 44%.
قازاقستاندا وندىرىلمەيتىن كوكونىستەر مەن جەمىستەردىڭ كەيبىر تۇرلەرى مىسالى، اپەلسين، بانان، ليمون جانە تاعى باسقاسى بويىنشا تاۋەكەلدەر بار. ولار قىمباتتاۋى مۇمكىن. ءبىراق ايتارلىقتاي ەمەس. ءبىز مونيتورينگ جۇرگىزىپ جاتىرمىز. سوڭعى اپتادا ەشتەڭە قىمباتتاعان جوق»، - دەدى سەرىك جۇمانعارين ۇكىمەتتەگى باسپا ءسوز ءماسليحاتىندا.
ونىڭ ايتۋىنشا، دۇكەندەردەگى باعا باقىلاۋدا. الداعى ۋاقىتتا ەلىمىزدە وسپەيتىن سيترۋس جەمىستەرىنىڭ باعاسى تومەندەۋى مۇمكىن.
«بىزدە وسپەيتىن اپەلسين، ليمون جانە تاعى باسقا سيترۋس جەمىستەرىنە توقتالايىن. ءقازىر ەۋرازيالىق ەكونوميكالىق كوميسسيا (ەەك) الاڭىندا وسى ءونىم تۇرلەرىنە كەدەندىك اكەلۋ باجىن تومەندەتۋ ماسەلەسىن قاراستىرىپ جاتىر.
ەلىمىزدە جىلىجاي سالاتىن كاسىپورىندار بار. جوعارىداعى جاعداي ولاردىڭ قىزمەتىنە قالاي اسەر ەتەتىنىن، نارىقتا قىسىم بولمايتىنىن قاراستىرامىز. جاقىندا ءبىز شەشىمدى قابىلدايمىز. ەگەر ءبىز كاسىپكەرلەرىمىزگە ءقاۋىپ توندىرمەيتىنىمىزگە كوزىمىز جەتسە، وندا باج كولەمىن ازايتامىز. مەنىڭ ويىمشا، بۇل ۆاليۋتا باعامىنىڭ اسەرىن جويادى»، - دەدى ۆيسە-پرەمەر.