سەبەبى اتالمىش مەكەمەلەر كەمشىلىك جىبەرگەن.
مەديسينالىق ساقتاندىرۋ قورى 2021 جىلى الماتى تۇرعىندارىنا كورسەتىلگەن تەگىن مەديسينالىق كومەك ساپاسىن باقىلاۋ جۇمىستارىنىڭ ناتيجەسىن قورىتىندىلادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
مونيتورينگ ناتيجەسىندە الماتى قالاسى بويىنشا 75 مىڭ قىزمەت ءتۇرلى كەمشىلىكتەرمەن كورسەتىلگەنى انىقتالدى. وسىعان بايلانىستى قالاداعى ەمدەۋ مەكەمەلەرىنە 1،8 ملرد تەڭگە ايىپپۇل سالىندى. بۇل مالىمەتتى «الەۋمەتتىك مەديسينالىق ساقتاندىرۋ قورى» كوممەرسيالىق ەمەس اكسيونەرلىك قوعامىنىڭ الماتى بولىمشەسى ۇسىندى.
مسق الماتى فيليالى ديرەكتورى تىلەۋحان ابىلدايەۆتىڭ سوزىنە سۇيەنسەك، كەمشىلىكتىڭ باسىم بولىگىنە باستاپقى مەديسينالىق-سانيتارلىق كومەك ۇيىمدارى جول بەرگەن. ەمحانالار كورسەتكەن قىزمەتتەن 60 مىڭ كەمشىلىك انىقتالىپ، 194،6 ملن تەڭگە قايتارىپ الىندى.
سونىمەن قاتار، اقاۋمەن كورسەتىلگەن 15 مىڭ قىزمەت ستاسيونارلار مەن ستاسيوناردى الماستىراتىن كومەك ۇيىمدارىنا تيەسىلى. ولار اتالعان كەمشىلىكتەر ءۇشىن 1،6 ملرد تەڭگە ايىپپۇل تولەدى.
«مونيتورينگ بارىسىندا انىقتالعان كەمشىلىكتەردىڭ دەنى ەمدەۋ-دياگنوستيكا بارىسىندا بەلگىلەنگەن ستاندارتتاردان اۋىتقۋ، مەديسينالىق قۇجاتتاردى دۇرىس تولتىرماۋ، قىزمەت باعاسىن نەگىزسىز ءوسىرۋ سىندى ولقىلىقتارعا سايادى. سونىمەن قاتار، «كورسەتىلدى» دەپ جازىلعان بەلگىلى ءبىر قىزمەت تۇرلەرىنىڭ شىن مانىندە كورسەتىلگەنىن راستاي الماعان كلينيكالار دا بار»، - دەدى تىلەۋحان ابىلدايەۆ.
ەستەرىڭىزگە سالا كەتسەك، قور ساراپشىلارى حالىققا كورسەتىلگەن قىزمەت ساپاسىن تۇراقتى باقىلاپ وتىرادى.
كورسەتىلگەن قىزمەت اقىسى دا جان-جاقتى تەكسەرۋدەن كەيىن تولەنەدى.
قايتارىپ الىنعان قاراجات مەديسينالىق كومەكتىڭ وزگە تۇرلەرىنە جۇمسالادى.